Истанбулда сайёҳлар орасида оммабоп бўлган Истиқлол кўчасига бомба ўрнатган шахс қўлга олинди, у Анқара террористик ташкилот деб ҳисоблайдиган Курдистон ишчилар партияси (КИП)га алоқадор, деб тахмин қилинмоқда. Бу ҳақда Туркия ички ишлар вазири Сулаймон Сойлу TRT Haber телеканали эфирида маълум қилди.
«Аввалроқ 21 киши қўлга олинди. Бомба қўйган одам ҳибсга олинди… Энг яқин вақтларда бизга бу оғриқни келтирганлар янада кўпроқ азобга дучор этилади», — деди у.
Шунингдек, унинг маълум қилишича, 81 нафар жабрланувчининг 50 нафари касалхонадан чиқарилган, беш киши реанимацияда ётибди, икки киши — оғир аҳволда. Аввалроқ олти киши ҳалок бўлгани ҳақида хабар берилганди.
Истанбулнинг Бейўғли туманидаги портлаш 13 ноябрь куни 16:20 (Тошкент вақти билан 18:20) атрофида юз берди. Воқеа содир бўлган Истиқлол кўчаси пиёдалар учун мўлжалланган бўлиб, сайёҳлар орасида энг оммабоп жойлардан бири ҳисобланади. У тўлиқ ёпиб қўйилган, шунингдек, ўша ерга яқин жойдаги Таксим масжиди ҳам ёпилган.
Туркия вице-президенти Фуат Октай бомбани аёл киши портлатганини маълум қилди. Шунингдек, у Туркия президенти Ражаб Тоййиб Эрдўғоннинг воқеа теракт деб ҳисобланиши ҳақидаги баёнотини тасдиқлади. Туркия Радио ва телевидение олий кенгаши маҳаллий ОАВларга портлаш видеоларини намойиш қилишни тақиқлади. Шунга қарамай, интернетда портлашнинг тахминий сабабчиси акс этган тасвирлар тарқалди.
Изоҳ (0)