Президенти ҳузуридаги Давлат хизматини ривожлантириш агентлиги Давлат фуқаролик хизматида ротация қилиш тартиби тўғрисидаги низом лойиҳасини жамоатчилик муҳокамаси учун эълон қилди.
Унга кўра, 2023 йил 1 январдан бошлаб давлат фуқаролик хизматчилари мажбурий, режали ва режадан ташқари тартибда ротация қилинади, яъни эгаллаб турган лавозимдан тенг бўлган бошқа давлат фуқаролик хизмати лавозимига ўтказилади.
Давлат фуқаролик хизматчисини ротация қилиш уларнинг салоҳияти ва тажрибасидан оқилона фойдаланиш, манфаатлар тўқнашуви, коррупцияга оид ҳуқуқбузарликларнинг олдини олиш мақсадида амалга оширилади.
Мажбурий равишда ротация тартибидаги тайинловлар лавозимни эгаллаган кундан бошлаб ҳар беш йилда амалга оширилади. Бунда қонунчиликка мувофиқ бошқа муддатлар белгиланиши мумкин.
Қуйидаги давлат фуқаролик хизматчилари ротация қилинмайди:
- тайёрлаш, қайта тайёрлашдан ва малака оширишдан ўтаётган;
- ҳомиладор аёллар, уч ёшга тўлмаган болалари бор аёллар;
- тиббий хулосага асосан ўзлари ёки улар билан бирга яшовчи оила аъзолари соғлиғи ҳолати ротация ўтказилаётган давлат фуқаролик хизмати лавозими бўйича хизмат мажбуриятларини амалга ошириш имкониятини бермайдиганлар;
- пенсия ёшига етишига уч йил қолганлар.
Ротация давлат фуқаролик хизматчиси ўтадиган лавозимга қўйиладиган малака талабларига жавоб бериши шарти билан амалга оширилади. Ротация асосида бошқа лавозимга тайинланган давлат фуқаролик хизматчиларининг самарали фаолияти учун зарур бўлган қўшимча касбий билимлар, кўникмалар ва малакаларни эгаллаш мақсадида давлат органи томонидан қайта тайёрлаш курслари ташкил этилади.
Ротация қилинаётган давлат фуқаролик хизматчисини ва унинг оила (турмуш ўртоғи ва фарзандлари) аъзоларини янги хизмат жойига кўчиб ўтиш харажатлари қопланади. Янги хизмат ўташ жойида яшаш учун турар жой ёки хизмат уйи билан таъминланади ёки турар жой ёки хизмат уйи билан таъминлашнинг имконияти яратилганга қадар оила аъзолари сонидан келиб чиққан ҳолда ижарага олинган уй учун ижара пули тўлаб берилади.
Ушбу ҳужжат лойиҳаси муҳокамаси 25 ноябргача давом этади.
Мавзуга доир:
Изоҳ (0)