Беларусь Миллий ассамблеяси Вакиллар палатаси депутатлари амнистия тўғрисидаги қонунни икки ўқишда қабул қилди, деб хабар бермоқда парламент матбуот хизмати.
БелТА маълумотларига кўра, амнистия бўйича ҳар хил турдаги жазони ўтаётган 4545 кишини озод қилиш режалаштирилмоқда. Улар орасида 1600 киши (шу жумладан ўн нафар вояга етмаганлар) колониялардан чиқарилади. Яна 3950 нафар маҳкумнинг жазо муддатини бир йилга қисқартириш кўриб чиқилмоқда.
«Қонун лойиҳасининг хусусиятларидан бири — гиёҳванд моддалар савдоси билан боғлиқ моддалар бўйича фақат вояга етмаганларга иккинчи имконият беришдир», — деди қонун лойиҳасини ишлаб чиқишда иштирок этган депутат Марина Ленчевская Беларусь радиоси эфирида.
Амнистия оғир ва ўта оғир жиноятлар, шунингдек, унча оғир бўлмаган жиноятлар тоифасига кирувчи айрим жиноятлар учун судланганларга нисбатан қўлланилмайди. Бундай шахсларга нисбатан озодликдан маҳрум қилиш ёки чеклаш тарзидаги жазо муддати бир йилга қисқартирилиши режалаштирилган.
«Зеркало» хабарига кўра, депутат Марина Ленчевская амнистия 2020 йилги намойишлар иштирокчиларига тааллуқли бўлмаслигини айтган. У «Экстремизм ва терроризм» билан боғлиқ жиноятлар учун судланганларга афв сўрашни таклиф қилган. Сентябрь ойи охирида Александр Лукашенко амнистияга «фақат айрим» сиёсий маҳбуслар киришини айтганди.
Мавзуга доир: Беларусда сайловлардан кейинги норозилик намойишлари бошланганига бир йил тўлди. Лукашенко рақибларига нима бўлди?
«Вясна» инсон ҳуқуқлари маркази маълумотларига кўра, 10 ноябрь ҳолатига Беларусда 1389 киши сиёсий маҳбус деб тан олинган.
Мавзуга доир:
- Беларусь мухолифати етакчиси Светлана Тихановскаянинг турмуш ўртоғи Сергей Тихановский 18 йилга қамалди. У 2020 йилда сайловда иштирок этмоқчи бўлган, бироқ якунда сайловда рафиқаси қатнашган
- Лукашенко терроризм учун ўлим жазоси ҳақидаги қонунни имзолади. Беларусда ушбу модда бўйича мухолифатчиларга айблов қўйилган
Изоҳ (0)