8 ноябрь куни Америка аҳолиси Конгресс Вакиллар палатасини тўлиқ таркибда, Сенатнинг учдан бир қисмини, 50 та штат губернаторидан 36 нафарини қайта сайлади. Сайловлар ҳудуд ва шаҳар даражасида ўтказилди. Тошкент вақти билан 9 ноябрь куни эрталаб Аляска ва Гавайида сўнгги участкалар ёпилди. Сайлов бюллетенларини санаш давом этмоқда. Ушбу сайлов натижалари Жо Байден президентлигининг кейинги икки йилига ва АҚШ сиёсатига, жумладан, Россия билан урушда Украинани қўллаб-қувватлашига таъсир қилади, деб ёзмоқда Meduza.
Республикачилар етакчилик қилмоқда. Америка матбуотининг дастлабки маълумотларига кўра, АҚШ Конгресси қуйи палатасидаги аксарият ўринларни Республикачилар партияси вакиллари эгаллайди. The New York Times ҳисоб-китобларига кўра, улар 435 ўриндан 193 тасига, демократлар эса 166 ўринга эгалик қилади. CNN маълумотлари бўйича республикачилар 195 ўринга, рақиблари 176 ўринга эга бўлади. Fox News хабарига кўра, республикачилар Вакиллар палатасида камида 199, демократлар эса 168 ўринни қўлга киритади.
Сенатдаги ўринлар учун икки партия ўртасида кураш давом этмоқда. Аввалига ОАВ ҳар икки партиянинг ютуқларини деярли тенг деб баҳолаган бўлса, кейинроқ демократлар етакчилик қилди. NBC, The New York Times ва CNN маълумотларига кўра, Сенатдаги (жами 100 ўрин) Демократик партия 48 киши, Республикачилар партияси 48 кишидан иборат бўлади. Fox News маълумотлари бўйича ҳам партиялар тенг қарама-қаршиликни давом эттирмоқда – ҳар бирига 48 тадан ўрин.
Шу билан бирга, CNN таъкидлашича, демократлар ҳам, республикачилар ҳам Сенатдаги асосий ўринларини ҳимоя қилишга муваффақ бўлган. Демократлар икки асосий ҳудудда — Колорадо (Майкл Беннетт) ва Ню-Гемпшир (Крис Паппас) ғолиб чиқди, Аризонада эса, дастлабки маълумотларга кўра, сезиларли фарқ билан етакчилик қилмоқда. Ўша штатдаги бюллетенларнинг ярмини санаб бўлгач, Fox News ва CNN демократ Марк Келлини сайловчиларнинг 56 фоизи, республикачи Блейк Мастерсни эса 41 фоиздан кўпроғи қўллаб-қувватлаганини хабар қилди.
Пенсильванияда Сенат учун сайловларда овозларнинг 90 фоиздан ортиғи санаб чиқилгач, демократ Жон Феттерман республикачи Меҳмет Ўздан 2,5 фоизга ортда қолди. Яна бир муҳим штат, Жоржияда амалдаги демократ сенатор Рафаэл Уорнок республикачи рақибидан 1 фоиздан камроқ овоз билан олдинда. Ўз навбатида, Флорида (Марк Рубио) ва Огайо (Жей Ди Венс) штатларида республикачилар сайланди.
Губернаторлик сайловларида, CNNнинг дастлабки маълумотларига кўра, республикачилар 16 штатда, демократлар 11 штатда етакчилик қилмоқда. Асосий ғалабалардан бири Республикачилар партияси вакили Рон Десантиснинг Флорида штатида қайта сайлангани бўлди. Телеканал маълумотларига кўра, у одатда демократларга овоз берадиган лотин-американ аҳолининг қўллаб-қувватловини олишга муваффақ бўлган.
Аксарият сайловчилар Жо Байденнинг президентлик фаолиятидан норози эди. Сўровномалар натижаларига кўра, сайловчиларнинг 53 фоизи амалдаги президентнинг 2024 йилда иккинчи муддатга сайланишини истамайди. Сўровда қатнашганларнинг ярмидан сал кўпи Байден сиёсати мамлакатга зарар етказаётганини айтган, учдан бир қисми эса бунга қарама-қарши фикрда.
Шунингдек, оралиқ сайловларда сайловчиларнинг овозига таъсир кўрсатган энг муҳим омил инфляция бўлди. Иккинчи ўринда — абортни тақиқлаш.
Изоҳ (0)