Украина бош вазири Киевни тўлиқ эвакуация қилиш имкониятини баҳолади

Киев ёки атрофида жанговар ҳаракатлар кечмаётган бошқа шаҳарлар аҳолисини эвакуация қилишга ҳозирча асос йўқ, деди Украина бош вазири Денис Шмигал Вазирлар Маҳкамаси йиғилишида.

«Эвакуация фавқулодда чора сифатида охирги қадам бўлиши мумкин. Ҳар доим Б режангиз бўлиши керак, аммо ҳозирги вазият бундан йироқ», — дея тушунтирди Украина ҳукумати раҳбари.

Шмигал энергетика хизмати ходимлари энергия тизимининг тўлиқ ишини тиклаш учун барча саъй-ҳаракатларни амалга ошираётганига ишонтирди. Унга кўра, ҳукумат иситиш мавсуми учун муҳим товарлар — газ генераторлари, трансформаторлар, электр аккумуляторлар, сув иситгичлари, иситгичлар ва бошқа маҳсулотлар учун ҚҚС ва импорт божларини бекор қилиш тўғрисидаги қарорни тасдиқлайди.

Аввалроқ The New York Times Киев ҳокимияти агар электр таъминотида буткул узилиш юз берса, шаҳар аҳолисини тўлиқ эвакуация қилишни режалаштираётгани ҳақида хабар берганди.

Россия 10 октябрдан буён Украина шаҳарлари ва инфратузилмасига асосан дронлар билан зарба бермоқда. Бундай зарбалар Қрим кўпригидаги портлашдан кейин бошланган, уни эса, Россия ҳукумати фикрича, Украина махсус хизматлари уюштирган. 31 октябрь куни Киевда кетма-кет портлашлар содир бўлди. Ўша куни Киев, Харьков ва Запорожье янги зарбаларга учради.

Россия зарбалари оқибатида Украина энергетика инфратузилмасининг 40 фоизи шикастланди.