Исроил бош вазири Яир Лапид Бинямин Нетаньяхуни 1 ноябрь куни бўлиб ўтган навбатдан ташқари парламент сайловларидаги ғалабаси билан табриклади, деб ёзади The Times of Israel.
«Исроил давлати ҳар қандай сиёсий нуқтаи назарлардан устун туради, ва мен Нетаньяхуга Исроил халқи ва давлатини деб муваффақият тилайман… Бош вазир идорасининг барча бўлинмаларига ҳокимият топширилишига тайёрланиш ҳақида кўрсатма бердим», — деб ёзди у Twitter’да.
Нетаньяхунинг «Ликуд» партияси иштирокидаги блок Кнессетда 120 та ўриндан 64 тасини эгаллаши кутилмоқда. Лапиднинг «Еш Атид» партияси иштирокидаги коалиция эса 50 ёки 51 та ўринни эгаллайди.
Бинямин Нетаньяху 12 йил давомида ҳукуматга раҳбарлик қилганидан кейин, 2021 йилда бош вазир лавозимидан кетганди. Бир йил ўтгач, унинг ҳокимиятдан четлатилишига эришган коалиция парчаланиб кетди ва навбатдан ташқари сайловлар белгиланди — бу 2019 йил апрелидан буён ўтказилган бешинчи сайлов бўлди.
Нетаньяху порахўрлик, фирибгарлик ва ишончни суиистеъмол қилиш билан боғлиқ жиноий ишларда айбланувчи сифатида иштирок этмоқда. Унинг коалиция бўйича шериги, ўта ўнг сиёсатчи Итамар Бен Гвир, ОАВларга кўра, Нетаньяхуга нисбатан суд жараёни тўхтатилишига эришиш учун, қонунчиликка тегишлича ўзгартиришлар киритишини айтган.
Изоҳ (0)