Isroil bosh vaziri Yair Lapid Binyamin Netanyaxuni 1-noyabr kuni bo‘lib o‘tgan navbatdan tashqari parlament saylovlaridagi g‘alabasi bilan tabrikladi, deb yozadi The Times of Israel.
“Isroil davlati har qanday siyosiy nuqtai nazarlardan ustun turadi, va men Netanyaxuga Isroil xalqi va davlatini deb muvaffaqiyat tilayman… Bosh vazir idorasining barcha bo‘linmalariga hokimiyat topshirilishiga tayyorlanish haqida ko‘rsatma berdim”, — deb yozdi u Twitter’da.
Netanyaxuning “Likud” partiyasi ishtirokidagi blok Knessetda 120 ta o‘rindan 64 tasini egallashi kutilmoqda. Lapidning “Yesh Atid” partiyasi ishtirokidagi koalitsiya esa 50 yoki 51 ta o‘rinni egallaydi.
Binyamin Netanyaxu 12 yil davomida hukumatga rahbarlik qilganidan keyin, 2021-yilda bosh vazir lavozimidan ketgandi. Bir yil o‘tgach, uning hokimiyatdan chetlatilishiga erishgan koalitsiya parchalanib ketdi va navbatdan tashqari saylovlar belgilandi — bu 2019-yil aprelidan buyon o‘tkazilgan beshinchi saylov bo‘ldi.
Netanyaxu poraxo‘rlik, firibgarlik va ishonchni suiiste’mol qilish bilan bog‘liq jinoiy ishlarda ayblanuvchi sifatida ishtirok etmoqda. Uning koalitsiya bo‘yicha sherigi, o‘ta o‘ng siyosatchi Itamar Ben Gvir, OAVlarga ko‘ra, Netanyaxuga nisbatan sud jarayoni to‘xtatilishiga erishish uchun, qonunchilikka tegishlicha o‘zgartirishlar kiritishini aytgan.
Izoh (0)