Шимолий Корея Япон денгизига номаълум баллистик ракета учирди, деб хабар бермоқда Yonhap агентлиги Жанубий Корея ҳарбийларига таяниб. Бу КХДРнинг сўнгги уч кун ичида тўртинчи марта ракета учириши. Агентлик аниқлик киритишича, бу сафар Пхеньян учта қисқа масофали баллистик ракетани учирган.
КХДР Меҳнат партияси марказий қўмитаси котиби Пак Чон Чхон АҚШ ва Жанубий Кореянинг Вигилант Сторм кенг кўламли ҳаво машқларини давом эттириш қарори «жуда хавфли ва нотўғри танлов» бўлганини айтди.
«АҚШ ва Жанубий Кореянинг мулоҳазасиз қарорлари қўшма кучларнинг провокацион ҳарбий ҳаракатлари натижасида юзага келган мавжуд вазиятни назоратдан чиқиб кетиш босқичига олиб бормоқда. Қўшма Штатлар ва Жанубий Корея тузатиб бўлмас даҳшатли хатога йўл қўйганини тушунмоқда», — дея унинг сўзларидан иқтибос келтирди Корея марказий телеграф агентлиги.
АҚШ ва Жанубий Корея ҳамкорлигидаги Вигилант Сторм ҳаво машғулотлари 31 октябрда бошланган ва 4 ноябргача давом этади. Уларда 240 дан ортиқ самолётлар, жумладан Американинг илғор F-35А яширин қирувчи самолётлари иштирок этмоқда. КХДРда ушбу машғулотлар босқинга тайёргарлик деб кўрилмоқда.
Октябрь ойида Шимолий Корея беш мартадан кўпроқ ракеталар учирди, шунингдек, қанотли ракеталарни синовдан ўтказди. Бундан ташқари, Жанубий ва Шимолий Корея ҳарбийлари ўртасида 24 октябрь куни отишма юз берди: КХДР кемаси Сариқ денгизда демаркация чизиғини кесиб ўтгани туфайли Сеул огоҳлантирувчи ўт очди, Пхеньян бунга жавобан баравар ўт очиш реактив тизимларидан 10 та снаряд учирди.
Изоҳ (0)