Аннексия қилинган Донецк халқ республикаси раҳбари Денис Пушилин Украина ва Россия ўртасида навбатдаги асирлар алмашинуви бўлиб ўтганини эълон қилди.
«Бугун биз Украина зиндонларидан 107 нафар жангчимизни қайтармоқдамиз. Украинага эса худди шунча асирларни топширмоқдамиз», — деб ёзди Пушилин Telegram’даги каналида.
Унинг сўзларига кўра, ДХР ва ЛХРнинг 65 нафар аҳолиси Украина асирлигидан қайтган.
Алмашинув ҳақида Украина расмийлари ҳозирча хабар бермаган.
Олдинги алмашинув (50 га 50 формуласи бўйича) 29 октябрь куни бўлиб ўтганди. Украина президенти офисининг раҳбари Андрей Ермакнинг айтишича, озод этилган украиналиклар орасида «Азов» жангчилари, Мариупол ва «Азовсталь» ҳимоячилари, Змеиний ороли денгизчиси ва Чернобил зонасида асирга олинган бир неча ҳарбийлар бор.
Ўшанда Пушилин ДХРдан етти киши, ЛХРдан икки киши Украина асирлигидан қайтганини айтган. Россия Мудофаа вазирлиги «асирликда ўлим хавфи остида қолган» 50 нафар ҳарбий хизматчи Россияга қайтарилганини маълум қилган.
Уруш бошланганидан бери энг йирик алмашинув 22 сентябрда бўлиб ўтган эди. Киев сиёсатчи Виктор Медведчук ва 55 нафар россияликни Украина Қуролли кучларининг 215 нафар ҳарбий хизматчисига, жумладан «Азов» қўмондонлари ва «Азовсталь» ҳимоячиларига алмаштирган.
Изоҳ (0)