Россияда ҳарбий хизмат муддатини икки йилга ошириш таклиф қилинди

Россияда ҳарбий хизмат муддатини икки йилга ошириш таклифи муҳокама қилинмоқда. Бундай таклифни Давлат думасининг Қримдан сайланган депутати Михаил Шеремет илгари сурди. У хизмат муддатини бир йилдан икки йилгача этиб белгилашни «имкон қадар тезроқ амалга ошириш зарур» деб ҳисобламоқда, деб хабар берди «РИА Новости».

Унинг сўзларига кўра, техника такомиллашиб, дунё олға бормоқда, Қуролли кучларга янги тизимлар, янги комплекслар киритилмоқда, уларни эса бир йилда ўзлаштириб бўлмайди. «Шунинг учун мен бундай таклифни олқишлайман, бу мутлақо тўғри, деб ўйлайман», — деди депутат.

Федерация Кенгашининг мудофаа қўмитаси раҳбари Виктор Бондарев ҳам Россияда икки йиллик муддатли ҳарбий хизмат муддатини қайтариш тарафдори.

Унинг айтишича, айни пайтда бу масала муҳокама қилинмоқда. «Биз (Федерация Кенгаши қўмитаси) Мудофаа вазирлиги, ҳарбий хизмат кўрсатиладиган бошқа ҳуқуқ-тартибот идоралари билан маслаҳатлашамиз. Ўйлайманки, буларнинг барчаси қўллаб-қувватланади», — деди Бондарев.

Шу билан бирга, Бондарев бундай қарор қачон қабул қилиниши мумкинлигини олдиндан айтиб бўлмаслигини таъкидлади.

У денгиз флоти кемаларида ҳам хизмат икки йил давом этиши керак, деб ҳисобламоқда.

2008 йилдан буён россиялик ҳарбий хизматчилар бир йил муддатга армияда хизмат қилади. Ундан аввал қуруқликдаги кучларда хизмат икки йил, денгиз флотида эса уч йил давом этган.