Қозоғистонда 1 млн доллардан ортиқ маблағни қиморга тикиб юборган мансабдорларга қатъий чоралар кўрилади

Қозоғистон бош прокурори ўринбосари Асет Чиндалиев маълум қилишича, қимор ўйнаб, катта миқдорда пул ютқазиб қўйган қозоғистонлик мансабдорларга нисбатан энг қатъий чоралар кўрилади.

Журналистлар бош прокурор ўринбосаридан амалдорлар қиморга сарфлаш учун бунча пулни қаердан олган бўлиши мумкинлиги ҳақида сўради.

«Ҳа, шундай ахборот тармоқда тарқалганди. Лекин ҳар битта ҳолат бўйича тегишли давлат органлари томонидан текширувлар ўтказилади. Ушбу текширувлар натижаларига кўра, энг қатъий чоралар қабул қилинади», — деди Чиндалиев.

Аввалроқ Алмати вилояти прокуратураси текширув олиб бориб, 305 нафар қозоғистонлик мансабдор казинода 507 миллион тенге (1, 092 миллион доллар) сарфлаганини аниқлаганди. Прокурорлар қиморхоналар ва ўйин автоматлари заллари фаолиятини текшириб, турли ҳудудлардан 305 нафар давлат хизматчилари давлат лавозимларини эгаллаб турган вақтида ушбу муассасаларга ташриф буюрганини аниқлаган. Қимор ўйинларига улар 507 миллион тенге сарфлаган.

Айни пайтда ушбу ҳолат юзасидан Давлат хизмати ишлари бўйича агентлик суриштирув олиб борилмоқда.