2022 йилнинг январь—сентябрь ойларида Ўзбекистонга импорт қилинган озиқ-овқат маҳсулотлари ҳажми 2,46 млрд долларни (2021 йилнинг мос даврида 1,8 млрд доллар) ташкил этди. Бу ҳақда Давлат статистика қўмитаси хабар бермоқда.
Жоирй йилги озиқ-овқат импорти 2021 йилнинг январь—сентябрь ойларига нисбатан 36,8 фоизга (663,1 млн доллар) ошди.
2021 йилнинг январь—сентябрь ойларида жами импорт таркибида озиқ-овқат маҳсулотларининг улуши 10 фоизни ташкил этган бўлса, 2022 йилнинг январь—сентябрь ойларида бу кўрсаткич 1,2 фоизга кўпайиб, 11,2 фоизни ташкил этди.
Йил бошидан бери 106 мамлакатдан озиқ-овқат маҳсулотлари импорти амалга оширилган. Улар орасида Қозоғистон етакчилик қилмоқда — 891,1 млн доллар ёки 36,2 фоиз.
Бу борада 590,9 млн долларлик кўрсаткич билан Россия иккинчи ўринни эгаллади. Бразилия эса Ўзбекистонга озиқ-овқат етказиб бериш бўйича учинчи ўринда — 362 млн доллар.
Шунингдек, йил бошидан бери Украинадан Ўзбекистонга озиқ-овқат етказиб бериш қарийб тенг ярмига камайиб, 21,3 млн долларни ташкил қилмоқда. Бу Россия ва Украина ўртасидаги уруш сабаб мамлакат қишлоқ хўжалиги зарар кўргани билан изоҳланади.
Аввалроқ Ўзбекистонда 2018—2020 йилларда аҳолининг қанча қисми тўйиб овқатланмагани маълум бўлганди.
Изоҳ (0)