Chexiya parlamenti Deputatlar palatasining Tashqi ishlar qo‘mitasi 3-noyabr, payshanba kuni Rossiya hukumatini terrorchi rejim deb tan oldi. Bu haqda Cheske Noviny chex nashri xabar berdi.
“Tashqi ishlar qo‘mitasi Yevropa Kengashi Parlament Assambleyasining rezolyutsiyasiga muvofiq Rossiyaning amaldagi rejimini terrorchi rejim deb tan oladi”, — deyiladi tegishli rezolyutsiyada.
Hujjatda Rossiyaning Ukrainaga qarshi agressiyasi: tinch aholiga, fuqarolik obyektlariga va asosiy infratuzilmaga hujumlari qoralanadi.
“Zaporojye atom elektr stansiyasining o‘qqa tutilishi va AES hududiga harbiy qismlarning joylashtirilishi Ukraina hududlaridagi tinch aholi uchun tahdiddir. Yadro qurolidan foydalanishga oid to‘g‘ridan to‘g‘ri yoki bilvosita tahdidlar, shuningdek, Ukrainani ommaviy qirg‘in qurolini qo‘llashni rejalashtirganlikda yolg‘on va asossiz ayblash taranglikning kuchayishi va Yevropa xavfsizligiga tahdiddir”, — deyiladi rezolyutsiyada.
Yevroparlament deputatlari Rossiya armiyasining harakatlari harbiy jinoyatlar va insoniyatga qarshi jinoyatlar belgilariga mos kelishini va aybdorlar jazolanishi kerakligini aytdi.
Qo‘mita Chexiya tashqi ishlar vaziri Yan Lipavskiyning Rossiya harbiy agressiyasiga aloqador barcha shaxslar uchun maxsus tribunal yaratish bo‘yicha sa’y-harakatlarini qo‘llab-quvvatladi.
Chexiya Rossiyani terrorchi rejim deb e’lon qilgan uchinchi davlat bo‘ldi. Avval Estoniya va Polsha tegishli rezolyutsiyalarni qabul qilgandi.
Izoh (0)