Экофаол Грета Тунберг БМТнинг Иқлим ўзгариши бўйича саммити ташкилотчиларини ёлғончиликда айблади

Яқинда 19 ёшга тўлган швециялик экофаол Грета Тунберг Бирлашган Миллатлар Ташкилотининг Иқлим ўзгариши бўйича конференцияси 27-экологик саммити ташкилотчиларини ёлғончиликда ва яшил кун тартиби орқали ўзини «оқлаш»га уринишда айблади, деб хабар бермоқда Reuters.

Унинг сўзларига кўра, «ҳокимиятдаги одамлар» экологияга қизиқмайди ва Иқлим ўзгариши бўйича саммит уларга «ўзини оқлаш, ёлғон ва фирибгарлик» учун имкониятдир.

«Саммитда Фуқаролик жамияти учун жойлар жуда чекланган бўлади. У ерда қатнашиши керак бўлганларга жой қолдириш керак. Фаолларнинг овози эшитилиши қийин бўлади», — деди Тунберг.

6—18 ноябрь кунлари БМТнинг Иқлим ўзгариши бўйича 27-конференцияси Шарм ал-Шайхда бўлиб ўтади.

БМТ веб-сайтига кўра, иқлим ўзгариши бўйича йиллик конференция «глобал иқлим бўйича музокараларни илгари суришда ёрдам беради, ҳаракатларни сафарбар қилади ва иқлим ўзгариши оқибатларини кўриб чиқиш имкониятини беради». 2021 йилда у Шотландиянинг Глазго шаҳрида ўтказилганди.

Тунберг 2003 йилда туғилган. Қизда Аспергер синдроми (ижтимоий ўзаро муносабатлардаги қийинчиликлар билан тавсифланган руҳий касаллик), обсессив-компулсив бузулиш ва селектив мутизм (муайян ижтимоий вазиятларда гапира олмаслик) мавжуд. Қизнинг сўзларига кўра, у 3-синфдан бошлаб экологик кун тартибига қизиқа бошлаган.

У 2019 йилда БМТ саммитидаги нутқи билан оммага танилганди. Ўшанда кўзларида ёш билан қиз мамлакатлар раҳбарларини ҳаракатсизлик, очкўзлик ва болалигини ўғирлашда айблаган. «Одамлар азоб чекмоқда, ўлмоқда, экотизимлар вайрон бўлмоқда. Биз оммавий қирилиб кетиш арафасидамиз, лекин сиз пул ва доимий иқтисодий ўсиш ҳақида гапиряпсиз», — деган у. Ўша йили Тунберг тинчлик бўйича Нобель мукофотига номзод бўлди.