Украина мудофаа вазири мамлакатни Ғарб қуролларини синовдан ўтказиш учун полигон деб атади

Украинага қурол-яроғлар етказиб бериш Ғарб мамлакатларига уларни жанговар ҳаракатлар шароитида текшириб кўриш имконини беради, вазият улар ўртасида самарадорлик даражаси бўйича мусобақага ўхшайди, деди Украина мудофаа вазири Алексей Резников Politico нашрига берган интервьюсида.

Унинг айтишича, Украина армияси ихтиёрида саккизта 155 миллиметрли турли артиллерия тизимлари бор ва уларни жангда қўлламоқда.

Резников келажакда Абрамс танклари ва F-16, F-15 ёки Gripen қирувчиларини қўлга киритишларига умид билдирди. Унинг қайд этишича, бундай турдаги қурол-яроғлар етказиб берилишининг рад этилиши бу энди ҳеч қачон маъқулланмаслигини билдирмайди. Мисол сифатида у Stinger кўчма зенит мажмуаси билан бўлган вазиятни келтириб ўтди: ўтган йил ноябрида АҚШ уни Украинага тақдим этишдан бош тортганди, бироқ Россия қўшинларини киритишидан бир ой аввал Литвадан бундай мажмуаларнинг етказилиши маъқулланган.

Энг яқин келажакда Украина қуролли кучлари учун Ғарбда ишлаб чиқарила оладиган асосий танк танлови бош масала бўлиши керак, дея давом этди Украина мудофаа вазири. У бунинг учун зарур саноатга эга Буюк Британия, Германия ва Франция АҚШнинг тегишли сиёсий қарорини кутишини тан олди.

Унинг қўшимча қилишича, Киев Вашингтондан Switchblade камикадзе дронлари партиясини кутмоқда. Украина ва Ғарб мамлакатлари Россияга дронлар етказиб беришда айблаётган Теҳрон бу курашда ҳозирча устун келмоқда, деди у.

Резниковнинг Украинада Ғарб қурол-яроғ тизимлари текширилиши эҳтимоли ҳақидаги гапларини Россия Ташқи ишлар вазирлиги изоҳлади. «Буни биз аллақачон тушуниб етганмиз ва дунёни Киев режими томонидан ‘ифлос бомба’ қўлланилиши хавфидан огоҳлантирганмиз», — деб ёзди идора вакили Мария Захарова.