Россия ядровий машғулотлар ўтказади, бу ҳақда у АҚШни хабардор қилди

Россия АҚШни «Яшин» номи остида стратегик ядро кучлари машғулотларини ўтказиш режалари ҳақида хабардор қилган. Бу ҳақда Пентагон матбуот котиби Патрик Райдер брифинг чоғида маълум қилди. Ўқув машқлари 26 октябрь, чоршанба куни бошланади.

«АҚШ хабардор қилинди, аввалроқ таъкидлаганимиздек, бу Россия томонидан ҳар йили ўтказиладиган оддий ўқув машқлари», — деди Райдер ва Вашингтон Россия манёврларини «кузатишда давом этиши»ни қўшиб қўйди.

Пентагон матбуот котиби қайд этишича, АҚШ Россия ядро қуролидан ёки «ифлос бомба» (кам қувватли ядровий ўқ-дори)дан фойдаланишни режалаштираётганидан дарак берувчи белгиларни кўрмаяпти. «Россия ядровий, кимёвий ёки биологик қуролни қўллашга қарор қилгани бўйича ҳеч қандай далиллар йўқ», — дея қўшиб қўйди у.

Аввалроқ CBS телеканали икки нафар америкалик мансабдорга таяниб, ушбу машғулотлар ядро қуроли ташишга қодир ракеталар парвозини ўз ичига олиши ҳақида хабар берганди.

Стратегик тийиб туриш кучларининг «Яшин» машғулотлари бундан аввал 19 февралда ўтказилганди. Ўшанда ўқув машқларининг боришини Россия президенти Владимир Путин беларуслик ҳамкасби Александр Лукашенко билан биргаликда кузатганди.

Ўшанда машғулотлар доирасида «Кинжал» гипертовушли ракеталари, «Калибр» қанотли ракеталари ва «Циркон» гипертовушли ракетаси денгиз ва қуруқликдаги нишонларга қарата учирилганди. Астрахань вилоятида «Искандер» қанотли ракетаси парвози амалга оширилган. Камчаткада «Синева» ва «Ярс» баллистик ракеталари отилган.

Айни пайтда НАТОнинг ядровий тийиб туриш бўйича Steadfast Noon («Мустаҳкам чошгоҳ») режали ўқув машғулотлари бўлиб ўтмоқда, у 17 октябрь куни бошланиб, 30 октябрга қадар давом этади, унда 14 та мамлакат ва 60 тагача ҳарбий самолётлар қатнашмоқда. Машқлар «Европа шимоли-ғарби осмонида» — Бельгия ва Британия ҳаво ҳудудида, шунингдек, Шимолий денгиз осмонида ўтказилмоқда.