Жанубий Корея президенти Юн Сок Ёл агар Пхеньян мулоқот ва ядросизланишга тайёр бўлса, Сеул КХДРга сиёсий ва иқтисодий ёрдам кўрсатишини айтди.
«Агар Шимолий Корея ядросизланишга қарор қилса ва мулоқотга киришса, ҳукуматимиз бизнинг дадил режамиз (ядросизланиш йўлидаги муҳим қадамлар эвазига Шимолий Корея иқтисодиётини модернизация қилиш режаси — «Дарё» изоҳи) асосида сиёсий ва иқтисодий ёрдам кўрсатиш учун қўлидан келганини қилади», — дея Yonhap агентлиги Юн Сок Ёлнинг сўзларидан иқтибос келтирди.
Шу билан бирга Жанубий Корея президенти Шимолий Кореянинг яқинда ўтказган баллистик ракета синовларини «БМТ Хавфсизлик Кенгаши резолюцияларини жиддий бузиш ва халқаро ҳамжамиятга тўғридан-тўғри қарши чиқиш» деб атади.
«Улар нафақат ядро қуролидан превентив фойдаланиш ниятини очиқдан очиқ эълон қилди, балки афтидан еттинчи ядровий синовга тайёргарликни якунлади», — деди у.
Юн Сок Ёл АҚШ ва Япония билан хавфсизлик соҳасида ҳамкорлик қилиш орқали йирик имкониятлардан фойдаланган ҳолда Шимолий Кореяни тийиб туришни кучайтиришга ваъда берди.
Изоҳ (0)