Исроил президенти Ицхак Герцог АҚШга ташрифи чоғида Россия Украина ҳудудида Эрон дронларидан фойдаланганига оид далилларни эълон қилади. Бу ҳақда Исроилнинг Ynet нашри хабар бермоқда. Бу Жо Байден президентлик лавозимига киришганидан буён Герцогнинг АҚШга биринчи ташрифи бўлади.
Хабарга кўра, визуал таҳлил ёрдамида Исроил мудофаа идораси Украинада Эронда ишлаб чиқилган учувчисиз учар қурилмалар билан бир хил бўлган дронлар бўлаклари борлигини аниқлаган.
Президент Герцог АҚШ ҳукуматига Shahed-136 дронлари Эронда 2021 йил декабридаги ўқув машғулотлари чоғида портлагани акс этган тасвирларни тақдим этади. Уларни Украинадаги жанговар ҳаракатлар чоғида уриб туширилган худди шундай учар қурилмалар сурати билан солиштириб кўрсатади.
Қайд этилишича, Эрон ўз дронларидан фойдаланилганини рад этаётганига ҳамда уларни «ниқоблаш» учун русча ёзувлар туширилганига қарамай, суратларда қурилмаларнинг стабилизаторлари тузилиши, катталиги ва рақамланиши бўйича бир хил эканини кўриш мумкин.
Исроил ва Украина муносабатлари
13 октябрь куни Киев вилоятида муҳим инфратузилма объектлари камикадзе дронлар зарбаларига учраган эди. Шундан кейин Украина ташқи ишлар вазири Дмитрий Кулеба Исроил ҳукуматига расмий нота юбориб, Киевга ҳаво ҳужумига қарши мудофаа тизимларини етказишни сўрашини маълум қилганди.18 октябрь куни Исроил ва Украина мудофаа вазирлари Бенни Ганц ва Алексей Резников ўртасида телефон орқали мулоқот ўтказилиши керак эди, бироқ Исроил томони сўнгги лаҳзада қўнғироқни рад этди.
Музокаралардан бош тортилишини нашр Россия Хавфсизлик кенгаши раиси ўринбосари Дмитрий Медведевнинг баёноти билан боғламоқда, у аввалроқ «Исроил томонидан Киевга қурол-яроғ берилиши мамлакатларимиз ўртасидаги барча давлатлараро муносабатларни бузиши» ҳақида огоҳлантирганди. Эртаси куни Ганц Исроил Украинага қурол тақдим этмаслигини маълум қилди.
Кейинроқ эса Исроил Украина ҳарбийларига Эрон дронларига қарши курашиш учун зарур бўлган разведка маълумотларини тақдим этиб келгани маълум бўлди.
Россияга камикадзе дронларни Эрон етказиб бераётгани ҳақида АҚШ ва Европа мамлакатлари ҳукуматлари гапирганди. Бу ҳақда Америка ОАВлари ҳам ёзганди. Хусусан, The Washington Post манбаларига кўра, Теҳрон Москвага «ўнлаб» Mohajer-6 ва кўп сонли Shahed-136 учувчисиз учар қурилмаларини тақдим этмоқчи бўлган. 20 октябрь куни Евроиттифоқ Эроннинг дрон ишлаб чиқарувчи Shahed компаниясига қарши санкциялар киритди.
Россиянинг БМТдаги миссияси Ғарб мамлакатлари маълумотларини дезинформация кампанияси ҳамда Москва ва Теҳронга босим ўтказиш учун тўқиб чиқарилган баҳона деб атади. Эроннинг БМТдаги доимий вакили Амид Саид Ираваний ҳам дронлар етказиб берилаётгани ҳақидаги айбловлар асоссиз эканини айтганди.
Изоҳ (0)