Эронда Ислом инқилоби посбонлари корпуси (ИИПК) полковники ўлдириб кетилди, воқеа 25 октябрь куни мамлакат жануби-шарқидаги Захедан шаҳрида, Эрон Белужистони пойтахтида юз берган. Бу ҳақда Эроннинг Tasnim ахборот агентлиги хабар берди.
ИИПК офицери, полковник Муллашоҳий «Басиж» ташкилоти командирларидан бири Жавад Киҳа билан бирга машина ичида ўтирган вақтида ўлдириб кетилган. Режимнинг ҳаракатчан пиёда аскарларидан иборат ушбу бўлинмаси Эронда сўнгги 15 йил давомида ҳукуматга қарши намойишларни шафқатсизлик билан бостиришда айбланиб келади.
Баъзи маълумотларга кўра, Эрон камикадзе дронларининг Россияга етказиб берилиши учун ҳам шу одамлар масъул бўлган.
Эслатиб ўтамиз, аввалроқ Исроил самолётлари Дамашқ яқинидаги Эрон дронларини йиғиш линиясига ҳужум қилган эди.
Шунингдек, Исроил Украина ҳарбийларига Эрон дронларига қарши курашиш учун зарур бўлган разведка маълумотларини тақдим этгани маълум бўлганди.
Эрон дронлари атрофидаги можаро
The Washington Post нашри даъво қилишича, Россия Федерацияси, гўёки, Эрон билан қурол-яроғ етказиб бериш ҳақида янги келишувлар имзолаган, улар доирасида Россия қўшинлари биринчи марта «ер-ер» синфидаги Эрон баллистик ракеталари ва учувчисиз учар қурилмалар партиясини қабул қилиб олади.Август ойида Эрон Россияга жанговар дронларнинг биринчи партиясини юборгани ҳақида маълумот пайдо бўлганди.
Сентябрь ойида Россия кучлари Украинанинг орқа шаҳарларига ҳужум қилиш учун Shahed-136 камикадзе-дронларидан оммавий равишда фойдаланишни бошлаган.
20 октябрь куни Евроиттифоқ Эроннинг дрон ишлаб чиқарувчи Shahed компаниясига қарши санкциялар киритди.
Россиянинг БМТдаги миссияси Ғарб мамлакатлари маълумотларини дезинформация кампанияси ҳамда Москва ва Теҳронга босим ўтказиш учун тўқиб чиқарилган баҳона деб атади. Эроннинг БМТдаги доимий вакили Амид Саид Ираваний ҳам дронлар етказиб берилаётгани ҳақидаги айбловлар асоссиз эканини айтганди.
Изоҳ (0)