Байден коронавирусга қарши учинчи бустер вакцина билан эмланди

АҚШ президенти Жо Байден 25 октябрь куни коронавирусга қарши учинчи бустер (кучайтирувчи) вакцинани олди.

«Қани, давом эттирайлик. COVID-19 га қарши кузги дозани олинг, гриппга қарши эмланинг, бу осон», — деди у вакцина олишидан олдин.

Унинг аниқлик киритишича, америкаликларнинг кўпчилиги учун йилига битта доза етарли бўлади.

Байден ўз президентлик даври бошидан буён АҚШда COVID-19 билан касалланганлар сони 80 фоизга, коронавирус инфекцияси туфайли вафот этганлар сони эса 90 фоизга камайганини эслатди. У бундай кўрсаткичлар соғлиқни сақлаш тизими фаолияти натижаси эканини таъкидлаб, Конгрессни вирусга қарши курашиш учун қўшимча маблағ ажратишга чақирди.

Аввалроқ президент COVID-вакцинасининг янгиланган дозасини олиши маълум қилинганди, бу эса айни пайтда АҚШда энг кўп тарқалган омикрон штаммининг БА.4 ва БА.5 субвариантларига қарши ишлаб чиқилган. 20 миллиондан ортиқ америкаликлар аллақачон янгиланган вакцинани олган.

Байден шу йилнинг март ойи охирида коронавирусга қарши иккинчи бустер дозани олган эди. Шундан сўнг у икки марта коронавирус билан касалланган.