“Rossiya qamoqxonalaridagi vatandoshlarimiz urushga yuborilishiga tomoshabin bo‘lib turmaslik zarur” — iqtisodchi Otabek Bakirov O‘zbekiston rasmiylariga murojaat qildi

“Novaya gazeta. Yevropa” nashri Rossiya tarkibiga kiruvchi Mordoviyadagi koloniyadan “Vagner” yollanma jangchilari tarkibida Ukrainadagi jangovar zonaga jo‘natilgan mahbuslar shaxsini aniqlagani xabar qilingandi. Qamoqxonadan jami yuzdan ortiq kishi frontga yuborilgan bo‘lib, ularning yarmi O‘zbekiston, Tojikiston, Moldova, Serbiya va Misr shuningdek, Ukraina fuqarolari ekani keltirilgan.

Iqtisodchi Otabek Bakirov mazkur xabar yuzasidan O‘zbekiston rasmiylariga murojaat qilib, o‘zbekistonliklarning urushga yuborilishiga tomoshabin bo‘lib turmaslikka chaqirdi.

Urushga yuborilgan mahbuslar qatorida, afsuski, O‘zbekiston fuqarolari ham bor. Nashr (“Novaya gazeta. Yevropa”) Baxtiyer Kuvandikov, Kuralbek Kuchkarov, Islombek Soborov, Azamat Zulunov, Sordor Zakirov va Nasimxon Movlonov kabilarning nomini sanagan (ularning familiyasi va ismi ruscha o‘lchovlarda yozilgan). Avvalroq Yaroslavl va Vladimirdagi qamoqxonalardan o‘zbekistonlik mahbuslarni urushga yuborishga urinishlar bo‘lgani yozilgandi.

Qamoqxonadagi mahbuslarni urushga yollash bilan asosan Putinning qassobi sifatida tanilgan Prigojin rahbarligidagi “Vagner” guruhi shug‘ullanmoqda.

O‘zbekiston rasmiylari qamoqxonalardagi mahbus vatandoshlarimizning urushga yuborilishiga chetdan tomoshabin bo‘lib turmasligi zarur. Chunki mahbuslarda afsuski tanlov bo‘lmaydi, ularni bosim ostida majburlash ham shart emas.

Kimdir mahbus-ku, jazoga loyiq deb qo‘l siltashi, ko‘z yumishi mumkin. Lekin ular ham xaq-huquqlarga ega, qolaversa vatandoshlarimiz.

Adashmasam, O‘zbekiston va Rossiya o‘rtasida mahbuslarni almashish bo‘yicha bitim mavjud. Bir necha yil avval Rossiya qamoqxonalarida 7 ming o‘zbekistonlik mahbus borligi aytilardi. Bu kichik raqam emas, har biri alohida taqdir, alohida fojia”.

Otabek Bakirov, iqtisodchi. 

Avvalroq turkmanistonlik muxolifatchi siyosatchi Murod Qurbonov mahalliy faollarga tayanib, Turkmanistonda yuzlab mahbuslar Ukrainadagi urushga yuborilganini ma’lum qilgandi.