АҚШ Демократик партиясидан 30 нафар Конгресс аъзоси президент Жо Байденга мактуб йўллаб, уни Россия билан тўғридан-тўғри музокаралар бошлашга чақирди. Уларнинг таъкидлашича, бу урушнинг тугашига олиб келиши мумкин, деб ёзмоқда The Washington Post.
Мурожаат бир гуруҳ либерал конгрессмен-демократлар томонидан тайёрланган, унга парламент қуйи палатасига Вашингтондан вакиллик қилувчи Прамила Жаяпала бошчилик қилган.
Мурожаат муаллифларининг фикрича, Украинага мисли кўрилмаган ҳарбий ва молиявий ёрдам кўрсатаётган Байден «ўт очишни тўхтатишга реал асос» топиш учун Россия билан бевосита музокараларни ҳам бошлаши керак. Уларнинг таъкидлашича, дипломатик ечимдан бошқаси «ҳалокатли ва ақл бовар қилмайдиган хавфлар» билан «узоққа чўзилган уруш»ни англатади.
The Washington Post таъкидлаганидек, Демократик партиядаги бир гуруҳ сафдошлари биринчи марта Байденни Украинадаги урушга оид сиёсатни кескин ўзгартиришга чақирмоқда.
Оқ уй АҚШ Давлат департаменти конгрессменларнинг мурожаатига изоҳ берар экан, Жо Байден ҳали Россия билан тўғридан-тўғри музокаралар ўтказиш ғоясини қўллаб-қувватламаётганини маълум қилди.
АҚШ президенти маъмурияти Миллий хавфсизлик кенгашининг стратегик алоқалар бўйича координатори Жон Кирби Украинанинг иштирокисиз Россия билан музокаралар олиб бориш ҳамон имконсиз эканини айтди. Давлат департаменти матбуот котиби Нед Прайснинг таъкидлашича АҚШ Россиянинг мулоқот ва дипломатик саъй-ҳаракатларга тайёрлигига белги кўрмаяпти.
АҚШ — Украинанинг асосий иттифоқчиларидан бири бўлиб, унга кўп миллиард долларлик ёрдам, жумладан, қурол-яроғ етказиб бермоқда. Қўшма Штатлар Россиянинг Украинага босқини бошланганидан сўнг, Россияга қарши бир нечта санкциялар пакетини ҳам жорий қилди.
Изоҳ (0)