Қозоғистонда 13 йиллик танаффусдан кейин биринчи марта Республика куни нишонланмоқда

Бугун, 25 октябрь куни Қозоғистонда 13 йилдан буён биринчи марта Республика куни нишонланмоқда. Байрам 2009 йилда бекор қилинганди, бироқ бу йил президент Қосим-Жўмарт Тўқаев ташаббуси билан унга миллий байрам мақоми қайтариб берилди. Бу ҳақда Asia Plus хабар бермоқда.

Остонада ва бошқа йирик шаҳарларда тантанали ва кўнгилочар тадбирлар ўтказилмоқда, кечқурун эса пойтахтда байрам мушакбозлиги бўлиб ўтади. Эрталаб давлат раҳбари қароргоҳи ёнида давлат байроғини кўтариш маросими ўтказилди.

2022 йил июлида Миллий қурултой мажлисида Тўқаев миллий байрамлар рўйхатига бир қатор ўзгартиришлар киритиш вақти келганини айтганди.

«Республика кунига миллий байрам мақомини қайтариб беришни таклиф қиламан. Шуни эслатмоқчиманки, 1990 йил 25 октябрда Қозоғистон давлат суверенитети ҳақидаги декларация қабул қилинган. Бу мамлакатимизнинг мустақиллик йўлидаги биринчи қадами бўлган. Ушбу ҳужжатни қабул қилишда биринчи президент Нурсултан Назарбоев жуда муҳим ролни ўйнаган», — деганди Қозоғистон раҳбари ўшанда.

Унинг фикрича, Республика куни мамлакатнинг давлатчилик сари ташлаган тарихий қадами рамзига айланиши керак.

Қозоғистон ССР суверенитети ҳақидаги декларацияда республика ҳудудининг яхлитлиги, бўлинмаслиги ва дахлсизлиги, халқлар маданиятлари ва тилларининг ривожланиши, миллий ўзига хосликнинг мустаҳкамланиши белгилаб қўйилганди. 2009 йилгача ушбу ҳужжат имзоланган кун давлат байрами бўлиб келган.

Эслатиб ўтамиз, Қозоғистонда Биринчи президент куни давлат байрамлари тоифасидан чиқариб ташланди. Қозоғистонда Биринчи президент куни 1 декабрда нишонланган ва у дам олиш куни ҳисобланарди. Байрам давлатнинг биринчи раҳбари Нурсултон Назарбоев шарафига ташкил этилган: 1991 йил 1 декабрда у республика президенти этиб сайланган. Ушбу байрамга давлат байрами мақоми бериш тўғрисидаги қонун 2011 йил 14 декабрда имзоланган эди.

Аввалроқ Тўқаев Қозоғистон «тасодифан мустақилликка эришгани» ҳақидаги гапларга жавоб қайтарганди. У мамлакат «тасодифан эркинликка эришган» деб ўйламайди, қозоқ халқи «суверенитетга олиб борувчи муқаддас йўлдан узоқ йиллар юриб ўтган».