Россиянинг 75 та ҳудудида қарийб 31 минг нафар эркак сафарбарлик эълон қилинганидан кейин зудлик билан оила қурган. Бу ҳақда «Медиазона» ўз ҳисоб-китобларига таяниб хабар берди.

Қонунга мувофиқ, алоҳида ҳолатларда, шу жумладан, чақирув қоғози олинган ҳолларда ҳам, ариза берилган куни (бир ойдан кейин эмас) никоҳ қайд эттириш мумкин. Сафарбар этилган шахс яраланган ёки ҳалок бўлган тақдирда, унинг оила аъзолари товон пулига, шунингдек, ҳудудий маъмурият кўмагига даъвогарлик қилиши мумкин.

39 та ҳудуд учун «Медиазона» маҳаллий ҳукуматлар, ФҲДЁ ёки ОАВлар томонидан эълон қилинган «тезлаштирилган тўйлар» ҳақидаги маълумотлардан фойдаланди, 36 та ҳудуд учун эса «ортиқча» тўйлар сонини сентябрдаги тўйлар сони ҳақидаги маълумотларга таяниб, ўзи ҳисоблаб чиқди.

17 та ҳудуд ФҲДЁлари томонидан тақдим этилган маълумотларга кўра, ойнинг сўнгги икки ҳафтасида (19—30 сентябрь) никоҳлар сони ошган: масалан, Бурятияда сафарбарликдан аввал бир ҳафтада ўртача 83 та тўй ўтказилган бўлса, сафарбарлик эълон қилинганидан кейин уларнинг сони 662 тага етган.

«Медиазона» фикрича, ушбу маълумотлардан сафарбар этилган россияликларнинг умумий сонини ҳисоблашда фойдаланиш мумкин, бунинг учун уларни никоҳсиз жуфт бўлиб яшаётган эркаклар сони ҳақидаги маълумотлар билан қиёслаш керак. Журналистлар ҳисоб-китобларига кўра, ушбу тоифада сафарбар этилган эркакларнинг ўртача фоизи 1,56% га тенг; демак, бутун мамлакат бўйлаб 492 минг киши сафарбар қилинган бўлиши мумкин.

Эслатиб ўтамиз, Россияда қисман сафарбарлик 21 сентябрь куни эълон қилинди ва 300 минг киши армияга чақилиши маълум қилинди. 14 октябрь куни аллақачон 222 минг киши сафарбар этилгани ҳақида хабар берилди.