Хитой собиқ етакчиси Ху Цинтао Коммунистик партия қурултойи президиумида ўтирган вақтида қўлтиғидан ушлаб залдан олиб чиқиб кетилди, деб хабар бермоқда BBC. Видеолавҳаларга қараганда, 79 ёшли Ху учун бу кутилмаган вазият бўлган, у ўз жойини тарк этишни истамаган. Ҳодиса сабаблари ҳақида хабар берилмаяпти.
Ху Цинтао президиумда мамлакатнинг амалдаги раиси Си Цзиньпин билан ёнма-ён ўтирган. Ху Цинтао президиумни тарк этаётганида Сига қарата нимадир деди, у эса бунга жавобан бош ирғиди. Шундан кейин Хитой собиқ раҳбари мажлислар залидан олиб кетилди.
Қурултойнинг ёпилиш маросимида Ху Цинтаонинг жойи бўш қолди.
Хитой Коммунистик партиясининг 16 октябрдан 22 октябргача бўлиб ўтадиган қурултойидан кейин Си Цзиньпин яна беш йиллик муддатга партия ва мамлакат етакчиси сифатида сайланиши кутилмоқда.
Бунга қадар қурултой делегатлари Хитой Коммунистик партиясининг янги Марказий қўмитаси сайлаган ва раис Си томонидан таклиф этилган, Компартиянинг социализм ҳақидаги уставига тузатишларни маъқуллаган эди.
Ху Цинтао 2003 йилдан 2013 йилгача Хитой етакчиси бўлган ва беш йиллик иккита муддатдан кейин ҳокимиятни Си Цзиньпинга топширган.
Изоҳ (0)