Россия армияси босиб олинган Херсон вилоятининг ғарбий қисмидан ўз кучларини олиб чиқишни бошлади. Бу ҳақда Американинг Урушни тадқиқ қилиш институти (Institute for the Study of War — Американинг мудофаа ва халқаро масалалар соҳасида тадқиқотлар олиб борувчи ноҳукумат ташкилоти, у Россия Украинага бостириб кирганидан буён фронтдаги ҳолатни таҳлил қилиб боради) хабар берди.
ISW таҳлилчилари Украина армияси хабарларига таянмоқда, улар аввалроқ Россия кучлари ўқ-дорилар, техника ва баъзи бўлинмаларни Днепрнинг ғарбий қирғоғидан шарқий қирғоғига «анча фаол равишда» олиб ўтаётганини ва фронт чизиғини ушлаб туриш учун қарийб 2 минг нафар сафарбар этилганларни йўналтиргани, бу орқали, катта эҳтимол билан, қўшинлар чекинаётганини бекитишга уринаётганини маълум қилганди.
Айни вақтда ISW ҳисоботида таъкидланишича, мудофаани ушлаб турган ва бошқа кучлар олиб кетилганини яшириб турган отряд тайёргарликдан ўтган ва профессионал бўлиши керак. «Яхши тайёргарликдан ўтмаган, яқинда сафарбар этилган россиялик захирадаги аскарлар, Украина кучлари уларга ҳужумга ўтишга ва чекинаётган кучларни таъқиб этишга қарор қилган тақдирда, Украина ҳужумига туриб бериши ва қаршилик кўрсатиши эҳтимоли кам», — деб ёзади ISW.
Бундан ташқари, Урушни тадқиқ қилиш институти Россия чекинаётганини яшириш ва Украина қўшинларининг Россия кучларини Херсон вилояти ичкарисигача таъқиб қилишига йўл қўймаслик учун вилоятдаги Кахов ГЭС дамбасини портлатиб юбормоқчи экани ҳақидаги прогнозини яна такрорлади. Дамбага зарар етказиш бўйича жавобгарликни Россия Украина зиммасига юкламоқчи.
«Украина ўзининг 80 та шаҳрини сув остида қолдириб, юз минглаб одамларнинг кўчирилишига олиб келиши мумкин бўлган, шундоқ ҳам заиф бўлган энергия таъминотига зарар етказадиган тўғон портлатилишидан моддий манфаатдор эмас», — дейилади ISW маърузасида.
19 октябрь куни Владимир Путин Украинанинг расман босиб олинган ҳудудларида, шу жумладан, Херсон вилоятида ҳарбий ҳолат эълон қилди. Ўша куниёқ у ерда эвакуация бошланди.
20 октябрь куни Россия Мудофаа вазирлиги Украина қуролли кучлари Херсон вилояти ва Донбассга ҳужум бошлаганини маълум қилди. Ундан сал аввалроқ Украинага ҳужумнинг янги қўмондони Сергей Суровикин «Херсон йўналишида вазият қийин» эканини ва у «мураккаб қарорлар қабул қилиниши»ни истисно этмаётганини айтганди.
Изоҳ (0)