Қозоғистон пойтахти қайта номлашлар сони бўйича рекордчи шаҳар сифатида яна Гиннесс рекордлари китобига киритилди, деб ёзади Tengrinews. 60 йил ичида шаҳарнинг номи беш марта ўзгарган.
Шаҳар худди шу йўналиш бўйича аввал ҳам рекорд ўрнатган, 17 сентябрь куни аввалги номини қайтариб олганидан кейин ўз рекордини янгилаган.
Гиннесс рекордлари китоби сайтида қайд этилишича, Остона 1997 йилда Қозоғистон пойтахтига айланган, бироқ дастлаб Акмола деб аталган.
1961 йилдан 1991 йилгача шаҳар Селиноград (қўриқ ерлар шаҳри) деб аталган , чунки қўриқ ва фойдаланилмайдиган ерларни ўзлаштириш бўйича совет кампанияси доирасида қишлоқ хўжалигини кенгайтириш дастури марказларидан бири бўлган. 1961 йилгача у Акмолинск деб аталган. 1991 йилда Қозоғистон мустақилликка эришганидан кейин унинг номи Акмола деб ўзгартирилган.
Кейинроқ, 1998 йилда шаҳар Остона деб, 2019 йилда эса Нур-Султон деб қайта номланган. 2022 йил сентябрида президент Қосим-Жўмарт Тўқаевнинг фармони билан шаҳарга аввалги номи — Остона қайтариб берилди.
Изоҳ (0)