НАТОга аъзо мамлакатларнинг деярли барчаси Швеция ва Финляндиянинг альянсга қўшилишини ратификация қилди, бу ҳақда Швеция бош вазири Ульф Кристерссон НАТО бош котиби Йенс Столтенберг билан қўшма матбуот анжуманида маълум қилди, деб ёзади «Коммерсантъ».
Столтенберг, ўз навбатида, Швеция ва Финляндияга босим ўтказилган тақдирда, уларни қўллаб-қувватлашга ваъда берди. Швеция ва Финляндиянинг блокка аъзо бўлишини ратификация қилмаган иккита мамлакат қолди, булар — Венгрия ва Туркия.
«Швеция ва Финляндия қандайдир босим остида қолган тақдирда, иттифоқдошлари томонидан қўллаб-қувватланмаслиги ақлга сиғмайди», — деди НАТО бош котиби. Столтенберг қайд этишича, кўплаб мамлакатлар альянснинг потенциал янги аъзоларига хавфсизлик кафолатларини тақдим этган. Кристерссоннинг айтишича, Швеция НАТОнинг аксилтеррорчилик фаолиятида фаол қатнашади.
НАТО Парламент ассамблеяси сайтидаги маълумотга кўра, альянсга янги аъзолар қабул қилинишини ҳали Венгрия ва Туркия ратификация қилиши керак. Будапешт ушбу масала бўйича яқин кунларда овоз бериши мумкин. Туркия эса аввалроқ бир қатор шартлар бажарилган тақдирдагина бу мамлакатларнинг НАТОга аъзо бўлишига розилик берганди, улар орасида Анқара террорчилик фаолиятига алоқадор деб ҳисоблайдиган шахсларнинг унга топширилиши ҳам бор.
18 май куни Финляндия ва Швеция Украинадаги жанговар ҳаракатлар авж олган бир пайтда НАТОга қўшилиш учун ариза берган. Туркия Хельсинки ва Стокгольмни мамлакатда тақиқланган Курдистон Ишчилар партияси билан ҳамкорликда айблаб, уларнинг альянсга қўшилишга бир муддат тўсқинлик қилди.
Швеция ва Финляндия НАТО блокига қўшилиши учун альянсга аъзо бўлган 30 та мамлакатнинг барчаси тегишли битимни ратификация қилиши керак.
Изоҳ (0)