20 октябрь куни бутун Украина бўйлаб электр токи ўчирилади

20 октябрь куни бутун Украина бўйлаб барқарорлаштирувчи электр таъминотида узилишлар юз беради. Бу ҳақда Украина президенти офиси раҳбари ўринбосари Кирило Тимошенко ва «Укрэнерго» компанияси маълум қилди.

Бунга Россиянинг Украина энергетика объектларига ҳужумларидан сўнг энергетика тизимидаги қувват тақчиллиги сабаб бўлмоқда, деб изоҳлади «Укрэнерго».

Бугун, 19 октябрь куни Украина Қуролли кучлари билан жанг майдонида рақобатлаша олмайдиган душман яна фуқаролик энергетика инфратузилмасига ҳужум қилди. Шунинг учун, эртага биз тизимнинг мувозанатли ишлаши учун назорат остида ҳисобланган истеъмолчи чекловларини қўллаймиз, — дейилади 19 октябрь куни кечқурун эълон қилинган хабарда.

Шунингдек, 20 октябрдан бошлаб Украина шаҳарларида кўчаларни ёритиш чекланади, дея қўшимча қилди Тимошенко.

Киев мери Виталий Кличко дўконлар, кафе ва ресторанлар эгаларидан табел ёритгичларини тежашни сўради — пойтахтда иситиш мавсуми 20 октябрдан бошланади. Одесса вилояти ҳарбий маъмурияти раҳбари Максим Марченко корхоналарда ҳам электр энергияси узилишини айтди. Николаев мери Александр Сенкевичнинг сўзларига кўра, шаҳарда 20 октябрь куни кўчаларда троллейбуслар сони 60 фоизга қисқаради ва светофорлар ўчирилади.

Россия 9 октябрь куни Қрим кўпригида рўй берган портлашдан сўнг Украинадаги энергетика объектларига мунтазам равишда ҳужум қила бошлади. Россия расмийлари портлашни уюштиришда Украина разведка хизматларини айблади.

18 октябрь куни Украина президенти Владимир Зеленский Украина электр станцияларининг учдан бир қисми Россия зарбаларига учраганини айтди. 19 октябрь куни, унинг сўзларига кўра, яна учта энергетика объектига ҳужум қилинган.

Аввалроқ, энергетика инфратузилмаси ўққа тутилгани сабабли, Украина ҳукумати мамлакат аҳолисидан электр энергияси истеъмол қилишни чеклашни сўраган эди.