АҚШ Мудофаа вазирлиги SpaceX компаниясига Украинада Starlink сунъий йўлдош интернет фаолиятини таъминлаш учун ҳозирча маблағ тўлагани йўқ. Бу ҳақда вазирлик матбуот котиби АҚШ ҲҲК бригада генерали Патрик Райдер маълум қилди.
«Украина ва Starlink масаласига келсак, АҚШ Мудофаа вазирлиги ушбу босқичда SpaceX’га ҳеч қанақа маблағ тўлагани йўқ», — деди Пентагон вакили. «Украинани сунъий йўлдош алоқаси билан таъминлаш бўйича кенгроқ масалани оладиган бўлсак, биз буни SpaceX ва бошқа компаниялар билан муҳокама қиляпмиз ва ушбу хизматларни қай тарзда тақдим этиш яхшироқ бўлишини аниқлаштиряпмиз», — дея қўшиб қўйди у.
Бироқ сал аввалроқ SpaceX раҳбари Илон Маск Пентагоннинг Украинада Starlink хизматларини тўлаб бериш эҳтимоли ҳақидаги баёнотига жавобан, компания Америка ҳарбий идорасидан энди пул сўрамаслигини айтганди.
АҚШ давлат котибининг Европа ва Евросиё масалалари бўйича ёрдамчиси Карен Донфрид Америка миллиардернинг Украинада Starlink сунъий йўлдош алоқаси тизими фаолиятини молиялаштиришда давом этишга тайёрлигини маъқуллашини таъкидлаганди. У, шунингдек, сунъий йўлдош алоқаси тизими Украина ҳудудида жанговар ҳаракатларнинг боришига сезиларли даражада таъсир қилаётганини қайд этганди.
Аввалроқ CNN SpaceX сентябрь ойида Пентагонга мурожаат қилиб, Украинада Starlink терминаллари фаолиятини молиялаштиришни сўрагани, чунки буни ўзи бошқа амалга ошира олмаслиги ҳақида хабар берганди. Компания шу йил охиригача бўлган харажатларни 120 миллиондан зиёдга, келаси йилги чиқимларни эса 400 миллион долларга баҳолади.
Пентагонга йўналтирилган ҳужжатлар орасида Украина қуролли кучлари бош қўмондони генерал Валерий Залужний номидан яна қарийб 8 мингта Starlink терминаллари учун сўров бор эди. Компания маълумотларига кўра, Украина олган сунъий йўлдошларнинг қарийб 85 фоизи АҚШ ва Польша томонидан тўланган.
Шундан кейин Киев алоқага тўлаш йўлини топишини маълум қилди. Оқ уй Starlink Украина учун муҳим эканини тушунишларини билдириб, «Украина томони айтаётган бу эҳтиёжларни яхшироқ таъминлаш» вариантларини кўриб чиқаётганини маълум қилди.
Маск айни вақтда Россия Украинада Starlinkни «ўлдиришга» уринаётганини, чунки бу тармоқ — жанговар ҳаракатлар зонасида ишлашда давом этаётган ягонаси эканини айтди. «Уни ҳимоя қилиш учун SpaceX жуда катта ресурсларни йўналтирди. Ҳатто шундай ҳолатда ҳам Starlink барибир ўлиши мумкин», — деди бизнесмен.
Октябрь бошларида Украина ҳарбийлари ўзлари бир-бири билан алоқа қилиш, разведка маълумотларини олиш ва учувчисиз учар қурилмаларни бошқариш учун фойдаланадиган Starlink фаолиятида узилишлар бўлаётганидан шикоят қилган, деб ёзади Financial Times.
15 октябрь куни Маск SpaceX зарар кўраётган бўлса-да, терминалларни бепул етказишда давом этишига ишонтирди.
Изоҳ (0)