2020 йилда Куштау тоғида фойдали қазилмалар қазиб олинишига қарши намойишларда қатнашган бошқирд миллатчилари сафарбарликка жавобан ҳамда республиканинг Россиядан ажралиб чиқиши ҳақидаги шиорлар остида қуролли қаршилик ҳаракатини туза бошлади. Бу ҳақда «Верстка» нашри хабар берди, у миллатчилар етакчиларидан бири Руслан Габбасов билан суҳбатлашди.
Нашр иккита ҳаракат ҳақида ҳикоя қилади. Биринчиси Габбасов раҳбарлик қилувчи «Бошқирд миллий сиёсий маркази» бўлса, иккинчиси — аноним бошқирд партизанлари бўлиб, улар Украинадаги уруш фонида юзага чиққан. Нашр «Бошқирд қаршилик қўмитаси» аноним Telegram-каналига таянмоқда, у эса Россия президенти Владимир Путин томонидан қисман сафарбарлик эълон қилинган кун — 21 сентябрда очилган. Унинг илк постида шундай дейилади: «Канал Бошқирдистонда Путин ҳокимиятига қарши миллий қаршиликни ташкиллаштириш учун яратилди. Митинглар ва намойишлар даври ўтди, энди фақат Путиннинг малайлари учун фақат Молотов коктейллари ва ўқлар қўлланилади».
Партизанлар бошқирд ва татар қишлоқларида сафарбарликни тўхтатишни талаб қилмоқда. Улар ҳарбий комиссариатларга, «Ягона Россия» идораларига ўт қўйиб, яширинча фаолият юритишга чақирмоқда. Мансабдорлар бу хатти-ҳаракатлар ва баёнотлар юзасидан ҳеч қандай изоҳ бергани йўқ.
«Бошқирд миллий сиёсий маркази» 2021 йилда ташкил топган бўлиб, у энг йирик «Бошкорт» миллий ташкилоти давомчиси, унга ҳам Габбасов раҳбарлик қилган, аммо у 2020 йилда экстремистик ҳаракат деб тан олинган. Габбасов икки йил аввал Куштау тоғида оммавий норозиликларни ташкиллаштирган фаоллардан биридир.
Габбасовнинг тарафдорлари Бошқирдистон учун суверенитетга эришмоқчи, улар ҳудуд Россия таркибидан чиқиб, ўз армиясига эга бўлган мустақил давлатга айланишини истаяпти.
Россияда сафарбарлик эълон қилинганидан кейин «Бошқирд миллий сиёсий маркази» «яширинча фаолият юритиб, Путин ҳокимиятига қарши партизанлар урушини олиб бориш»га даъват эта бошлаган. Унинг Telegram-каналида бошқирд қўшинлари тузила бошлагани ҳақида хабарлар пайдо бўлган.
Габбасов нашрга маълум қилишича, сафарбарлик бошлангач, кўпчилик бошқирд фаоллари Россиядан кетиб қолган, қолганлар эса яшириниб юрибди.
«Улар империя учун жанг қилишни хоҳламайди. Бу бизнинг урушимиз эмас, деган фикрда улар. Нима учун бошқирдлар ‘рус дунёси’ учун Украинанинг қаерларидадир ўлиб кетиши керак? Украиналиклар бизга ҳеч қандай ёмонлик қилгани йўқ, империя эса бизга доим босим ўтказиб келган. Улар бизнинг бошқирд тилимизга босим ўтказган, бизнинг етакчиларимизни қамаган. Нима учун энди биз улар учун жанг қилишимиз керак?» — деди у.
Изоҳ (0)