Ilon Mask Starlink Ukrainada bepul internet tarqatishda davom etishini ma’lum qildi
SpaceX kompaniyasining xarajatlariga qaramay, Starlink tizimining sun’iy yo‘ldosh aloqalari Ukrainada bepul ishlashda davom etadi. Bu haqda kompaniya asoschisi Ilon Mask Twitter’da ma’lum qildi.
“Jin ursin... Starlink hanuz pul yo‘qotayotgan, boshqa kompaniyalar esa soliq to‘lovchilardan milliardlab dollar olayotgan bo‘lsa-da, biz Ukraina hukumatini tekinga moliyalashtirishda davom etamiz”, — deb yozdi tadbirkor.
Oktabr oyi boshida Mask SpaceX Ukrainaga Starlink terminallarini yetkazib berish va texnik xizmat ko‘rsatish uchun 80 million dollar sarflagani, yil oxiriga kelib esa kompaniya xarajatlari 100 million dollardan oshishini aytgan edi.
14-oktabr kuni CNN telekanali SpaceX kompaniyasi AQSH Mudofaa vazirligiga maktub yuborgani haqida xabar berdi. Unda kompaniya Ukraina uchun Starlink sun’iy yo‘ldosh tarmog‘ini moliyalashtirishni davom ettira olmasligini ma’lum qilgan va Pentagondan buni zimmasiga olishni so‘ragan. SpaceX hisob-kitoblariga ko‘ra, Starlink’ni Ukrainada ishlatish qiymati yil oxirigacha 124 million dollarga yetadi.
Shu bilan birga, telekanal materialida aytilishicha, Ukrainadagi 20 mingta Starlink terminallarining qariyb 85 foizi to‘liq yoki qisman Polsha, Buyuk Britaniya va AQSH, shuningdek, ehson kampaniyalari va nodavlat tashkilotlar tomonidan moliyalashtirilgan. CNN ma’lumotlariga ko‘ra, ular doimiy internetga ulanish xizmatlarining taxminan 30 foizi uchun ham to‘lagan.
Mask CNN xabariga izoh berar ekan, SpaceX Ukraina uchun Starlink kompaniyasining avvalgi xarajatlarini qaytarishni so‘ramasligini, balki tizimni “cheksiz moliyalashtira olmasligini” aytdi.
Pentagon SpaceX’dan xat kelganini tasdiqladi. Vazirlik vakilining aytishicha, ular “Ukraina Qurolli kuchlari uchun yechim topish ustida ishlamoqda”. Oq uy Kiyevga sun’iy yo‘ldosh aloqasini ta’minlashda yordam berish imkoniyatlarini o‘rganayotganini ma’lum qildi.
