SpaceX kompaniyasi AQSH Mudofaa vazirligiga Ukrainada Starlink terminallari faoliyatini moliyalashtirish haqida kiritgan so‘rovini qaytarib oldi. Bu haqda kompaniya egasi Ilon Mask ma’lum qildi.

U bu haqda Politico nashrining ikki amerikalik mansabdorga tayanib, Pentagon qurol va uskunalar yetkazib berish uchun foydalaniladigan jamg‘arma orqali Starlink aloqa xizmatlarini uzoq muddatli istiqbolda moliyalashtirish imkoniyatini ko‘rib chiqayotgani haqidagi maqolasiga javoban aytib o‘tdi.

“Aniqroq qilib aytsak, Ukrainaga 25 300 ta terminal jo‘natilgan, biroq hozirgi paytda faqat 10 630 tasining faoliyati moliyalashtirilmoqda”, — deya qo‘shib qo‘ydi Mask.

Avvalroq CNN SpaceX sentabr oyida Pentagonga murojaat qilib, Ukrainada Starlink terminallari faoliyatini moliyalashtirishni so‘ragani, chunki buni o‘zi boshqa amalga oshira olmasligi haqida xabar bergandi. Kompaniya shu yil oxirigacha bo‘lgan xarajatlarni 120 milliondan ziyodga, kelasi yilgi chiqimlarni esa 400 million dollarga baholadi.

Pentagonga yo‘naltirilgan hujjatlar orasida Ukraina qurolli kuchlari bosh qo‘mondoni general Valeriy Zalujniy nomidan yana qariyb 8 mingta Starlink terminallari uchun so‘rov bor edi. Kompaniya ma’lumotlariga ko‘ra, Ukraina olgan sun’iy yo‘ldoshlarning qariyb 85 foizi AQSH va Polsha tomonidan to‘langan.

Shundan keyin Kiyev aloqaga to‘lash yo‘lini topishini ma’lum qildi. Oq uy Starlink Ukraina uchun muhim ekanini tushunishlarini bildirib, “Ukraina tomoni aytayotgan bu ehtiyojlarni yaxshiroq ta’minlash” variantlarini ko‘rib chiqayotganini ma’lum qildi.

Mask ayni vaqtda Rossiya Ukrainada Starlinkni “o‘ldirishga” urinayotganini, chunki bu tarmoq — jangovar harakatlar zonasida ishlashda davom etayotgan yagonasi ekanini aytdi. “Uni himoya qilish uchun SpaceX juda katta resurslarni yo‘naltirdi. Hatto shunday holatda ham Starlink baribir o‘lishi mumkin”, — dedi biznesmen.

Oktabr boshlarida Ukraina harbiylari o‘zlari bir-biri bilan aloqa qilish, razvedka ma’lumotlarini olish va uchuvchisiz uchar qurilmalarni boshqarish uchun foydalanadigan Starlink faoliyatida uzilishlar bo‘layotganidan shikoyat qilgan, deb yozadi Financial Times.

15-oktabr kuni Mask SpaceX zarar ko‘rayotgan bo‘lsa-da, terminallarni bepul yetkazishda davom etishiga ishontirdi.