Херсон раҳбари аҳолини Днепрнинг чап қирғоғига эвакуация қилиш ҳақида маълум қилди

Аннексия қилинган Херсон вилояти раҳбари Владимир Сальдо тўрт муниципалитет – Бериславский, Белозерский, Снигиревский ва Александровскийнинг тинч аҳолиси Днепрнинг чап қирғоғига «уюшган ҳолда кўчирилганини» эълон қилди, деб ёзади Meduza.

Сальдо бу қарорини Украина «катта кўламли ҳужум учун куч тўплаётгани» ва «Каховская гидроэлектр тўғони вайрон қилинса, ҳудудларни сув босиш хавфи» мавжудлиги билан изоҳлади.

Шу билан бирга, Сальдо «ваҳимачиларга қулоқ солмасликка» чақирди ва «Херсон вилояти Россия армиясининг ишончли ҳимояси остида қолишини» айтди.

Сальдо Днепрнинг ўнг қирғоғида жойлашган Херсон шаҳрининг эвакуация қилиниши ҳақида эса айтмади.