Украина президенти Владимир Зеленский «иложи борича кўпроқ русларни ўлдириш»га чақирган Қозоғистондаги элчи Пётр Врублёвскийни лавозимидан озод қилди, деб хабар бермоқда «РБК».
Украинанинг Қозоғистондаги элчиси Пётр Врублёвский қозоғистонлик блогер Диас Кузаировга берган интервьюсида Украинанинг мақсади — иложи борича кўпроқ русларни ўлдириш эканини айтганди.
Врублёвскийнинг интервьюсидан парча 22 август куни Россия ТИВ расмий вакили Мария Захарованинг Telegram-каналида эълон қилинди. Ушбу видеода Врублёвский Украина «иложи борича кўпроқ русларни ўлдирмоқчилигини» айтган. Шунингдек, у: «Ҳозир биз русларни қанчалик кўп ўлдирсак, фарзандларимиз ўлдириши учун улар шунчалик кам қолади», — деган.
«Бундай гапни фақат террорчилик режими элчисигина айтиши мумкин. Саккиз йил давомида Киев нацистлари жимгина қотиллик қилиб, ҳамма нарсада Москвани айблаб келганди, энди эса миллий тозалаш режалари ҳақида баралла айтилмоқда», — дея изоҳ берди Захарова.
Россия Тергов қўмитаси видеога баҳо бериб, барча иштирокчиларнинг шахсларини текширишини ҳамда уларнинг аввалроқ россиялик ҳарбий хизматчиларга қарши амалга оширилган жиноятларга алоқадорлигини текширишини маълум қилди.
5 сентябрь куни эса Врублёвский интервьюда айтган гаплари учун узр сўраб, таътилга чиқиб кетганди.
Кейинроқ у Пётр Врублёвский Остонага қайтиб келган, Россия Ташқи ишлар вазирлиги вакили Мария Захарова бунга жавобан Қозоғистонни «бандеровчи эмиссар ҳеч қачон Остонага қайтмаслиги» ҳақидаги ваъдасини бузганликда айблаганди. Шунингдек, у Қозоғистон элчиси Ермек Кошербаев Россия ТИВга чақирилиб, унга бундай вазият номақбуллиги тушунтирилганини айтди.
Шундан кейин Қозоғистон ТИВ вакили Айбек Смадияров Захарова изоҳларининг оҳанги «Қозоғистон ва Россиянинг тенг ҳуқуқли стратегик шериклар сифатидаги иттифоқдошлик муносабатлари хусусияти била уйғун эмас»лигини қайд этди ва Россия элчиси Алексей Бородавкин Қозоғистон ТИВга чақирилганини маълум қилди.
Шу билан бирга, Смадияров Украина элчиси тез орада алмаштирилишини, чунки Қозоғистон томони Россия ҳақидаги гаплари учун унинг мақомини «номақбул» деб ҳисоблашини айтди.
«Айни пайтда Украина ТИВдан Остонада янги элчини тайинлаш ҳақида сўров олинди. Қайд этишим керак, Украина томони билан бу масалада тўлиқ ҳамжиҳатлигимиз бор», — дея қўшиб қўйган эди Қозоғистон ТИВ вакили ўшанда.
Изоҳ (0)