Мадагаскар президенти Эндри Рахоелина ташқи ишлар вазири Ричард Рандриамандранатони мамлакат БМТда Украина шарқидаги референдумларни қоралаб овоз бергани учун ишдан бўшатди, деб ёзади «РБК».
Ташқи ишлар вазири БМТ Бош ассамблеясида овоз бериш бўйича Мадагаскар ҳукумати билан маслаҳатлашмаган. Президент Рахоелина таъкидлашича, мамлакат анъанавий тарзда бетарафликни сақлайди ва Мадагаскар овоз беришда бетараф қолиши керак эди.
Айни вақтда собиқ вазир овоз бериш Мадагаскарнинг миллий манфаатларига ҳеч қанақасига зарар етказмаганини айтди.
БМТ Бош ассамблеяси Донецк ва Луганск халқ республикаларида ҳамда босиб олинган Херсон ва Запорожье вилоятларида Россия томонидан ўтказилган «референдумлар»ни қораловчи резолюцияни 12 октябрь куни қабул қилди.
БМТга аъзо 193 та мамлакатдан 143 таси резолюцияни ёқлаб овоз берди. Бешта мамлакат — Беларусь, Шимолий Корея, Никарагуа, Сурия ва Россия қарши чиқди. Овоз беришда 35 та давлат бетараф қолди, улар орасида Хитой, Ҳиндистон, Ўзбекистон, Қирғизистон, Қозоғистон ва Тожикистон ҳам бор. Яна ўнта давлат эса овоз беришда қатнашмади.
БМТ Бош ассамблеяси резолюциялари Хавфсизлик кенгаши қарорларидан фарқли ўлароқ, декларатив (эълон қилинувчи) ҳужжатлар ҳисобланади.
Мавзуга доир:
Изоҳ (0)