Белгород вилоятидаги полигонда оммавий отишма содир этган кишиларнинг шахси аниқланди, деб хабар бермоқда Baza Telegram-канали. Улар Тожикистоннинг икки фуқароси — 23 ёшли Раҳмонов Меҳроб ва 24 ёшли Эсхон Аминзод бўлган. Baza Эхсон Аминзоднинг суратини эълон қилди.
Улар кўнгиллилар сифатида сафарбар қилиниб, 11 октябрь куни машғулот майдонига келган эди, дейилади хабарда. 4 кундан сўнг, 15 октябрь куни эрталаб улар машғулотларнинг бошқа иштирокчиларига қарата автоматдан ўқ узган.
Расмий маълумотларга кўра, полигонда юз берган отишма оқибатида 11 киши ҳалок бўлган, яна 15 киши яраланган. Ҳужум қилганлар ҳам ўлдирилган.
Россия Мудофаа вазирлиги ва Белгород вилояти губернатори Вячеслав Гладков полигондаги отишмани теракт деб атади. Вазирлик отишмани «МДҲ давлатларидан бири»нинг икки фуқароси содир этгани ҳақида маълум қилганди.
Изоҳ (0)