Россия Таълим вазирлиги ўқитувчилардан мактабларда ўқув жараёни доирасида WhatsApp ва бошқа хорижий мессенжерлардан фойдаланмасликни талаб қилди, деб ёзмоқда «Коммерсантъ».
Хабаровск ўлкаси ва Курск вилояти маъмуриятининг нашрга маълум қилишича, ҳудудлардаги ўқитувчиларга «ВК мессенжери»дан ҳамда ВК ва «Ростелеком» томонидан биргаликда ишлаб чиқилган «Сферум» ўқув платформасидан фойдаланиш тавсия этилган. Нижегород вилояти таълим вазирлиги эса мактаб ходимларидан WhatsApp, Viber, Skype ва Google Drive каби хизматлардан воз кечиш сўралганини маълум қилди.
«Чекловлар махфий маълумотларнинг сизиб чиқиб кетиши эҳтимолини бартараф этишга ёрдам беради», — дея изоҳ берди муассаса.
Россия Таълим вазирлиги журналистларга ҳудудларга хорижий мессенжерлардан фойдаланмаслик бўйича тавсиялар юборилаётганини тасдиқлади, лекин улар фақат «Менинг мактабим» давлат тизими ва унинг таркибий қисмлари билан ишлайдиганларга тегишли эканини таъкидлади.
Хорижий мессенжерлардан фойдаланишни чеклаш нафақат ўқитувчилар, балки ота-оналарга ҳам тавсия этилмоқда, деб маълум қилди «Коммерсантъ»га бир қатор вилоятлардаги ота-оналар. Нижнегород вилоятида ўқитувчилар ота-оналарга «хорижий интернет хизматларидан фойдаланиш имкониятидан воз кечиши» кераклигини айтмоқда ва буни ахборот хавфсизлиги таҳдидлари билан оқламоқда.
Сентябрь ойида Россия ҳукумати ва ВК ўртасида «Менинг мактабим» тизимини жорий қилиш доирасида «ВК Мессенжер», «ВК Звоноков» ва «Почта Mail.ru»дан фойдаланишни назарда тутувчи шартнома тузилган.
Июнь ойида ҳукумат Россия вилоятлари раҳбарларига ВК томонидан ишлаб чиқилган маҳаллий мессенжерни ишлатиш бўйича тавсиялар юборган.
Изоҳ (0)