Шимолий Корея сўнгги пайтларда тез-тез ракета учираётгани туфайли, Жанубий Корея унинг 15 нафар фуқароси ва 16 та ташкилотини қора рўйхатга киритди. Бу ҳақда мамлакат Ташқи ишалр вазирлиги хабар берди. Бу 2017 йилдан буён Жанубий Корея томонидан КХДРга қарши киритилаётган биринчи санкциялардир.
Рўйхатга мамлакат ядро ва ракета ишланмаларига ҳисса қўшган ҳамда БМТ Хавфсизлик кенгаши санкцияларидан бош тортишга алоқадор бўлган жисмоний ва юридик шахслар кирди.
«Ҳукумат Шимолий Корея томонидан мисли кўрилмаган даражада тез-тез амалга оширилаётган ва тактик ядро қуролини қўллашни кўзда тутадиган ракета провокацияларини қатъиян қоралайди», — дейилади идора хабарида.
Сеул 2015 йилдан 2017 йилгача Пхеньянга қарши беш марта санкциялар киритган, улар 109 нафар жисмоний ва 89 та юридик шахсларга таъсир қилган.
Аввалроқ Ким Чен Ин тактик ядро бўлинмаларининг ҳарбий тайёргарлигини кўздан кечирган эди. Хабарларга кўра, Ким Чен Ин АҚШ ва Жанубий Корея билан музокаралар олиб боришдан манфаатдор эмаслигини очиқ айтган.
«Бизда душманлар билан мулоқот қилиш учун асос йўқ, бунга эҳтиёж ҳам сезмаяпмиз», — дея унинг сўзларини келтиради ОАВ.
13 октябрь куни эса узоқ масофали қанотли ракеталар синовдан ўтказилгани маълум бўлди, ушбу жараёнга Ким Чен Ин шахсан раҳбарлик қилган.
Корея ярим оролидаги кескинлик охирги пайтларда кучайди. Пхеньян сентябрь ойи охиридан бери Жанубий Корея ва АҚШнинг ҳарбий машғулотларига жавобан мунтазам равишда баллистик ракета учирмоқда. Шунингдек, Шимолий Корея яқин келажакда ядровий синов ўтказиши мумкинлигидан хавотирлар кучаймоқда.
Изоҳ (0)