Украина президенти Владимир Зеленский Германиянинг ZDF каналига берган интервьюсида Россия билан музокоралар ҳақида гапирди, деб ёзади «Фокус».
Украина президенти Путиннинг атрофидагиларни «ҳар бири 50 граммдан ичиб олиб, ядро уруши билан таҳдид қилаётган кучукчалар» деб атади.
«Путиннинг атрофидагилар, унинг кучуклари — улар ҳатто ит ҳам эмас — шунчаки кучукчалар. Уларнинг ҳар бири 50 граммдан ароқ ичиб олиб: «Эртага ядро қуролидан фойдаланамиз!» деб жар солади», — деди Украина раҳбари журналистнинг Россиянинг ядровий шантажи ҳақидаги саволига жавобан.
Шунингдек, у Украина душман билан музокаралар олиб бориш ниятида эмаслигини қайд этди.
«Сизларни [ruslarni] ядро қуролидан фойдаланиш ҳақида гапирадиган одам бошқараяпти. Биз у билан гаплаша олмаймиз. Сиз билан бир столда ўтиролмаймиз, чунки биз террорчилар билан муомала қилишни истамаймиз», — деди Зеленский.
Украина президентининг сўзларига кўра, Москва Ғарбнинг кучли позициясига дуч келса, ядро қуролидан фойдаланмайди. Унинг сўзларига кўра, Европа давлатлари ҳамон Россия ва унинг таҳдидидан чўчимоқда.
«Европа ҳали ҳам бир оз қўрқув ҳисси билан яшаяпти», — дея қўшимча қилди Украина раҳбари.
Аммо Москвадан келаётган барча таҳдидлар ва ядровий шантажга уриниш Ғарбнинг Россияга ташаббусни ўз қўлига олишга рухсат бергани билан боғлиқ.
«Европа (Россияга) таъзим қилди. Лекин бунга йўл қўйиб бўлмайди! Уларнинг кўзига тик боқиш керак. Мен руслар таъзим қилишлари керак, демоқчи ҳам эмасман. Барча давлатлар тенг бўлиши ва бир-бирига тик кўз билан қараши керак», — дея таъкидлади Украина раҳбари.
«Айни пайтда Европанинг вазифаси ташаббусни Россия Федерациясидан тортиб олишдир», — дея қайд этди Зеленский.
Мавзуга доир:
Изоҳ (0)