Украина армияси келаси ҳафтадаёқ Херсон вилоятидаги Днепрнинг ғарбий қирғоғи устидан назоратни қайта қўлга киритиши мумкин, деб ёзади «Агенство Новости» Ғарб ҳарбийларидан иқтибос келтирган ҳолда.
Украинанинг Херсон вилоятидаги ҳужуми август ойининг охиридан бери давом этмоқда. Шу пайтдан бошлаб минтақанинг шимолидаги фронт Херсон томон 30 км дан кўпроқ силжиди. 13 октябрь куни Украина Қуролли кучлари аҳоли пунктлари озод қилингани ҳақида хабар беришда давом этди. Украина қўмондонлигига кўра, яна бешта аҳоли пункти ишғол қилинган.
Британия разведкаси 13 октябрь куни эрталаб Россия томонидан тайинланган ҳокимиятнинг шаҳар аҳолисини эвакуация қилиш қарори Херсонда яқинлашиб келаётган жанглар хавфи билан боғлиқлигини маълум қилди. «Охирги кунларда Россия босқинчилари Херсондан бир неча тинч аҳолини эвакуация қилишга тайёргарлик кўриш ҳақида буйруқ берган бўлиши мумкин. Улар жанглар Херсон шаҳрининг ўзига ҳам тарқалишини кутишаётгандир», — дея Британия Мудофаа вазирлиги вакилининг сўзларини келтиради манба.
13 октябрь куни Херсон вилоятининг Москва томонидан тайинланган раҳбари Владимир Салдо Россия раҳбариятига минтақа аҳолисининг Россия вилоятларига кетишига ёрдам бериш илтимоси билан мурожаат қилди ва буни шаҳарга ҳар куни амалга оширилаётган ракета ҳужумлари билан изоҳлади.
«Биз Херсон вилоятининг барча аҳолисига, агар шундай истак бўлса, ўзларини ракета зарбалари оқибатларидан ҳимоя қилиш учун бошқа ҳудудларга ҳам боришни таклиф қилдик. Булар, биринчи навбатда, Қрим, Ростов вилояти, Краснодар ва Ставропол ўлкаларидир», — деди Салдо.
Тез орада Бош вазир ўринбосари Марат Хуснуллин ҳукумат Херсон вилояти маъмуриятига минтақа аҳолисини бошқа ҳудудларга жойлаштиришда ёрдам беришини маълум қилди. «Биз ҳаммани бепул турар жой ва барча зарур нарсалар билан таъминлаймиз», — деди у.
Херсон Украинадаги Россия уруш бошидан бери эгаллаб олган ягона минтақавий марказдир. Сентябр ойи охирида The New York Times газетаси ҳарбий қўмондонлар шахсий таркиб ва ҳарбий техникани сақлаб қолиш учун Путиндан Херсондан Днепрнинг нариги томонига чекинишга рухсат сўрагани ҳақида хабар берган эди. Газетанинг ёзишича, Путин бу илтимосни рад этган. «Бундай чекиниш Путиннинг урушдаги мағлубиятини яна бир камситувчи тан олиш бўлади ва Украинага бир ой ичида иккинчи йирик ғалабасини олиб келади», — деб ёзади манба.
Изоҳ (0)