МДҲ мамлакатлари бутун ҳамдўстлик бўйлаб турли провокацияларга тайёр туриши керак, чунки ҳар битта давлатнинг чидамлилиги синовдан ўтказилади. Бу ҳақда Беларусь президенти Александр Лукашенко МДҲ давлатлари раҳбарлари кенгашининг тор таркибдаги мажлисида айтиб ўтди, деб ёзади «БелТА».
«Лекин, менимча, бу ердагиларнинг ҳаммаси тушунадики, Ғарб стратегларининг асл мақсадлари анча кенгроқ — Евросиё маконини таъсир секторлари бўйича бўлиб юбориш ва мамлакатларимиздан хом ашё ва саноат ўсимталари сифатида фойдаланиш. Бутун МДҲ бўйлаб энг хилма-хил провокацияларга тайёр туриш керак… Ҳамманинг чидамлилиги синалади», — деди Беларусь президенти.
Бундай провокацияларга мисол сифатида Лукашенко Қозоғистон ва Ўзбекистонда «яқинда бўлиб ўтган воқеалар»ни келтириб ўтди.
Лукашенко МДҲ ичкарисида ўзаро кўмак даражаси етарли емаслигини қайд этди. Бундай вазиятнинг сабаби сифатида у «совет иттифоқи ҳал қила олмаган ёки бунга улгурмаган» кўплаб миллатлараро ва ҳудудий баҳсларни айтиб ўтди.
«Бугунги кунда ташқи иштирокчилар ҳар битта, ҳатто энг аҳамиятсиз баҳсни ҳам қайноқ зиддиятга айлантириш учун катта куч сарфламоқда», — деди Лукашенко.
Беларусь президенти Ғарбни посцовет маконида ихтилоф юзага келтиришга уринишда аввал ҳам айблаганди. Хусусан, бу Россияни заифлаштириш учун зарур, деган эди у.
Хусусан, шу йилнинг июлида Лукашенко дунёни қайта тақсимлаш учун навбатдаги жанг Марказий Осиёда бўлишини айтганди. Яқин келажакда Марказий Осиёда икки куч ҳукмронлиги учун кураш олиб борилиши мумкин: бир томондан АҚШ ва Европа Иттифоқи, иккинчи томондан Хитой, деган фикрни билдирганди у.
Қозоғистонда нима бўлганди?
2 январь куни Қозоғистонда оммавий норозиликлар бошланди. Бунга газ нархининг ошиши сабаб бўлди. Кўп ўтмай намойишчиларнинг талаблари сиёсий тус ола бошлади. Намойишлардан кейин Қозоғистон биринчи президенти Нурсултон Назарбоев кўплаб давлат имтиёзларидан маҳрум бўлди, унинг қариндошлари ҳам раҳбарлик лавозимларидан кетди.Ўзбекистонда нима бўлганди?
1 июль куни Нукусда айрим фуқаролар амалга оширилаётган конституциявий ислоҳотларни нотўғри талқин қилиб, кутилмаганда кўча юришларини ташкил қилди. Нукуснинг Марказий деҳқон бозорида тўпланиб, намойишлар уюштирилди. Жамоат тартиби бузилишининг олдини олиш ҳамда фуқаролар томонидан турли тартиббузарликларни содир этишларига йўл қўймаслик мақсадида деҳқон бозори ҳудудига ҳуқуқни муҳофаза қилиш органларининг куч ва воситалари жалб этилди.Шавкат Мирзиёев 2 июль куни Нукусга борди ва Жўқорғи Кенгес депутатлари, Қорақалпоғистон фахрийлари ва фаоллари билан учрашув ўтказди. Учрашувда президент Конституциянинг Қорақалпоғистонга тегишли моддаларини амалдаги таҳрирда ўзгаришсиз қолдириш зарурлигини айтди. Қорақалпоғистон халқига мурожаат қилиб, Конституциявий қонун лойиҳаси референдумдан кейингина қонуний тусга киришини айтиб, фуқароларнинг хоҳиш-иродаси, таклиф ва фикрларидан келиб чиққан ҳолда, ушбу лойиҳа ўзгариб, такомилига етказилишини таъкидлади.
Изоҳ (0)