Остонада Қозоғистон президенти Қосим-Жўмарт Тўқаев раислигида МДҲга аъзо давлатлар раҳбарлари кенгашининг тор таркибдаги йиғилиши бўлиб ўтди, деб ёзади Tengrinews.
Тўқаев ҳамдўстлик мамлакатлари етакчиларига Қозоғистон ўтган бир йил давомида шериклар ва МДҲ Ижроия қўмитаси билан биргаликда олиб борган кўп томонлама ишларнинг асосий якунлари ҳақида маълумот берди. Унинг сўзларига кўра, Қозоғистон ўз раислигининг устувор вазифаларига мувофиқ иштирокчи давлатларнинг кўплаб йўналишлар бўйича саъй-ҳаракатларини дунё тараққиётининг ҳозирги жараёнларини ҳисобга олган ҳолда бирлаштиришга ҳаракат қилган.
«Ҳамкорликдаги ишлар туфайли савдо-иқтисодий ҳамкорликни кенгайтириш, яқин маданий-гуманитар алоқаларимизни сақлаб қолиш, шунингдек, ҳамдўстликнинг салоҳияти ва халқаро обрўсини оширишга қаратилган бир қатор муҳим ташаббуслар амалга оширилди. Осон бўлмаган геоиқтисодий шароитларда алоҳида эътибор ҳамдўстликнинг иқтисодий салоҳиятини мустаҳкамлашга ва, авваламбор, 2030 йилгача МДҲни иқтисодий ривожлантириш стратегияси низомларининг бажарилишига қаратилди. Тадбирлар режаси биринчи босқичининг муваффақиятли амалга оширилиши ишбилармонлик фаолиятини ошириш, ўзаро савдо ҳажмини кўпайтириш, иқтисодиётнинг пандемиядан кейинги қайта тикланишини тезлаштириш имконини берди. Глобал ва минтақавий иқтисодиётдаги турбулентлик шароитида яқин савдо-иқтисодий алоқаларни сақлаб қолиш учун бор салоҳиятни ишга туширишимиз лозим», — деди Қосим-Жўмарт Тўқаев.
Қозоғистон президентининг фикрича, иқлим мавзуси айниқса долзарблик касб этмоқда. Унинг таъкидлашича, иқлим ўзгариши МДҲнинг деярли барча мамлакатларида сув ресурслари билан таъминлаш муаммосини кучайтирмоқда.
«Биз бу масала билан турли халқаро форматлар доирасида шуғулланяпмиз, икки томонлама асосда ўзаро мақбул ечимларни қидиряпмиз. Шу билан бирга ўйлаймизки, бутун ҳамдўстлик маконида сув хавфсизлигини таъминлаш бўйича умумий ёндашувлар ишлаб чиқиш вақти келди. МДҲ Ижроия қўмитасига трансчегаравий сув ресурсларидан ўзаро манфаатли тарзда фойдаланиш бўйича муайян тавсиялар киритишни таклиф қиламан», — деди Қозоғистон раҳбари.
Шу ҳафта Остонада турли мамлакатлар давлат раҳбарлари ва вакиллари иштирокида халқаро саммитлар бўлиб ўтмоқда. Шу жумладан, Осиёда ҳамкорлик ва ишонч чоралари кенгаши саммити, МДҲ Давлат раҳбарлари кенгаши мажлиси, «Марказий Осиё — Россия» саммити ўтказилмоқда.
Изоҳ (0)