Lukashenko: “G‘arb butun MDH bo‘ylab provokatsiyalar tayyorlamoqda”

MDH mamlakatlari butun hamdo‘stlik bo‘ylab turli provokatsiyalarga tayyor turishi kerak, chunki har bitta davlatning chidamliligi sinovdan o‘tkaziladi. Bu haqda Belarus prezidenti Aleksandr Lukashenko MDH davlatlari rahbarlari kengashining tor tarkibdagi majlisida aytib o‘tdi, deb yozadi “BelTA”.

“Lekin, menimcha, bu yerdagilarning hammasi tushunadiki, G‘arb strateglarining asl maqsadlari ancha kengroq — Yevrosiyo makonini ta’sir sektorlari bo‘yicha bo‘lib yuborish va mamlakatlarimizdan xomashyo va sanoat o‘simtalari sifatida foydalanish. Butun MDH bo‘ylab eng xilma-xil provokatsiyalarga tayyor turish kerak… Hammaning chidamliligi sinaladi”, — dedi Belarus prezidenti.

Bunday provokatsiyalarga misol sifatida Lukashenko Qozog‘iston va O‘zbekistonda “yaqinda bo‘lib o‘tgan voqealar”ni keltirib o‘tdi.

Lukashenko MDH ichkarisida o‘zaro ko‘mak darajasi yetarli yemasligini qayd etdi. Bunday vaziyatning sababi sifatida u “sovet ittifoqi hal qila olmagan yoki bunga ulgurmagan” ko‘plab millatlararo va hududiy bahslarni aytib o‘tdi.

“Bugungi kunda tashqi ishtirokchilar har bitta, hatto eng ahamiyatsiz bahsni ham qaynoq ziddiyatga aylantirish uchun katta kuch sarflamoqda”, — dedi Lukashenko.

Belarus prezidenti G‘arbni postsovet makonida ixtilof yuzaga keltirishga urinishda avval ham ayblagandi. Xususan, bu Rossiyani zaiflashtirish uchun zarur, degan edi u.

Xususan, shu yilning iyulida Lukashenko dunyoni qayta taqsimlash uchun navbatdagi jang Markaziy Osiyoda bo‘lishini aytgandi. Yaqin kelajakda Markaziy Osiyoda ikki kuch hukmronligi uchun kurash olib borilishi mumkin: bir tomondan AQSH va Yevropa Ittifoqi, ikkinchi tomondan Xitoy, degan fikrni bildirgandi u.

Qozog‘istonda nima bo‘lgandi?

2-yanvar kuni Qozog‘istonda ommaviy noroziliklar boshlandi. Bunga gaz narxining oshishi sabab bo‘ldi. Ko‘p o‘tmay namoyishchilarning talablari siyosiy tus ola boshladi. Namoyishlardan keyin Qozog‘iston birinchi prezidenti Nursulton Nazarboyev ko‘plab davlat imtiyozlaridan mahrum bo‘ldi, uning qarindoshlari ham rahbarlik lavozimlaridan ketdi.

O‘zbekistonda nima bo‘lgandi?

1-iyul kuni Nukusda ayrim fuqarolar amalga oshirilayotgan konstitutsiyaviy islohotlarni noto‘g‘ri talqin qilib, kutilmaganda ko‘cha yurishlarini tashkil qildi. Nukusning Markaziy dehqon bozorida to‘planib, namoyishlar uyushtirildi. Jamoat tartibi buzilishining oldini olish hamda fuqarolar tomonidan turli tartibbuzarliklarni sodir etishlariga yo‘l qo‘ymaslik maqsadida dehqon bozori hududiga huquqni muhofaza qilish organlarining kuch va vositalari jalb etildi.

Shavkat Mirziyoyev 2-iyul kuni Nukusga bordi va Jo‘qorg‘i Kenges deputatlari, Qoraqalpog‘iston faxriylari va faollari bilan uchrashuv o‘tkazdi. Uchrashuvda prezident Konstitutsiyaning Qoraqalpog‘istonga tegishli moddalarini amaldagi tahrirda o‘zgarishsiz qoldirish zarurligini aytdi. Qoraqalpog‘iston xalqiga murojaat qilib, Konstitutsiyaviy qonun loyihasi referendumdan keyingina qonuniy tusga kirishini aytib, fuqarolarning xohish-irodasi, taklif va fikrlaridan kelib chiqqan holda, ushbu loyiha o‘zgarib, takomiliga yetkazilishini ta’kidladi.