Украинада 10 октябрь куни бошланган Россиянинг кенг кўламли ракета ҳужуми оқибатида энергетика инфратузилмасининг 30 фоизга яқини зарар кўрди. Бу ҳақда CNN телеканалига Украина энергетика вазири Герман Галушенко маълум қилди.
Унинг сўзларига кўра, Россия босқини бошланган февраль ойидан бери биринчи марта рус қўшинлари Украина энергетика объектларига мақсадли зарбалар берган.
Галушенконинг фикрича, инфратузилмага қилинган ҳужум сабабларидан бири Украинанинг Европага электр энергияси экспорти бўлган — у «Европа давлатларига Россия гази ва кўмирини тежашга ёрдам бераётган эди». Вазир Украина энергетика тизими ҳалиям барқарор эканини таъкидлади, бироқ ҳамкорларни Украинани инфратузилма объектларини ҳимоя қила оладиган ҳаво ҳужумидан мудофаа тизимлари билан таъминлашга чақирди.
10 октябрь куни Россия Украина шаҳарларига оммавий зарбалар берди. Россия президенти Владимир Путин Россия ҳужуми Қрим кўпригида 8 октябрь куни содир бўлган портлашга жавоб эканини айтди. Шу куни Россия мудофаа вазири Сергей Шойгу Украинадаги қўшинларнинг бирлашган гуруҳига янги қўмондон этиб тайинлагани маълум бўлди. ОАВ хабарларига кўра, айнан Шойгу инфратузилмага, жумладан, фуқаролик инфратузилмасига йирик ракета ҳужумлари уюштириш тарафдори деб таърифланади.
Изоҳ (0)