Ukrainada 10-oktabr kuni boshlangan Rossiyaning keng ko‘lamli raketa hujumi oqibatida energetika infratuzilmasining 30 foizga yaqini zarar ko‘rdi. Bu haqda CNN telekanaliga Ukraina energetika vaziri German Galushenko ma’lum qildi.
Uning so‘zlariga ko‘ra, Rossiya bosqini boshlangan fevral oyidan beri birinchi marta rus qo‘shinlari Ukraina energetika obyektlariga maqsadli zarbalar bergan.
Galushenkoning fikricha, infratuzilmaga qilingan hujum sabablaridan biri Ukrainaning Yevropaga elektr energiyasi eksporti bo‘lgan — u “Yevropa davlatlariga Rossiya gazi va ko‘mirini tejashga yordam berayotgan edi”. Vazir Ukraina energetika tizimi haliyam barqaror ekanini ta’kidladi, biroq hamkorlarni Ukrainani infratuzilma obyektlarini himoya qila oladigan havo hujumidan mudofaa tizimlari bilan ta’minlashga chaqirdi.
10-oktabr kuni Rossiya Ukraina shaharlariga ommaviy zarbalar berdi. Rossiya prezidenti Vladimir Putin Rossiya hujumi Qrim ko‘prigida 8-oktabr kuni sodir bo‘lgan portlashga javob ekanini aytdi. Shu kuni Rossiya mudofaa vaziri Sergey Shoygu Ukrainadagi qo‘shinlarning birlashgan guruhiga yangi qo‘mondon etib tayinlagani ma’lum bo‘ldi. OAV xabarlariga ko‘ra, aynan Shoygu infratuzilmaga, jumladan, fuqarolik infratuzilmasiga yirik raketa hujumlari uyushtirish tarafdori deb ta’riflanadi.
Izoh (0)