Ўзбекистонликлар учун Таиландда вақтинча бўлиш муддати 15 кундан 30 кунгача узайтирилди. Бу ҳақда «Дунё» ахборот агентлиги хабар берди.
Маълум қилинишича, Таиланд Вазирлар Маҳкамаси қарори билан 2022 йил 1 октябрдан 2023 йил 31 мартгача бўлган даврда мамлакатга келгач виза олувчи (Visa on Arrival) Ўзбекистон фуқароларининг ушбу мамлакатда вақтинча бўлиш муддати 15 кундан 30 кунгача узайтирилди.
Ўзбекистон Бош консулхонасидан олинган маълумотга кўра, шунингдек, барча тоифадаги фуқаролар учун эмлаш сертификати ёки ПЗР-тестини тақдим этиш талаби бекор қилинди.
Ўзбекистон фуқароларига визалар Visa on Arrival ёзуви мавжуд бўлган махсус ўтиш йўлакларида берилади.
Ушбу турдаги визаларни олиш учун қуйидаги ҳужжатлар талаб этилади:
- паспорт (Таиланддан кетиш режалаштирилган кундан бошлаб камида 6 ой амал қилиш муддати билан);
- 4×6 см ҳажмдаги 1 дона фотосурат, оқ фонда (виза берилишидан камида 6 ой олдин олинган бўлиши лозим, аэропорт ҳудудида ҳам 10 АҚШ долларга расмга тушиш имконияти мавжуд);
- қайтиш авиачиптасининг нусхаси;
- бир киши учун 2000 бат (тахминан 55 АҚШ доллари) виза тўлови, тўлов Таиланд батида амалга оширилади.
Изоҳ (0)