Адлия вазирлиги томонидан электр энергияси ва табиий газ таъминоти бўйича истеъмолчиларнинг ҳуқуқларини ҳимоя қилиш мақсадида Вазирлар Маҳкамасининг қарори лойиҳаси ишлаб чиқилди. Лойиҳада истеъмолчилар учун бир қатор енгилликлар яратилмоқда.
Биринчидан, электр энергияси ва табиий газни етказиб беришни чеклаш ва узиб қўйиш билан боғлиқ қоидалар фақат шартномада кўрсатилиши белгиланмоқда. Амалдаги қоидаларида электр энергияси ва табиий газни етказиб беришни чеклаш ва узиб қўйишга оид қоидалар назарда тутилган.
Шундан келиб чиқиб, электр энергияси ва табиий газ таъминоти бўйича узилишлар шартнома томонлари (истеъмолчи ва етказиб берувчи) ўртасидаги муносабатларга бегона шахслар аралашиб шартномада белгиланмаган янги ҳуқуқ ва мажбуриятларни юклашга оид нормалар чиқариб ташланмоқда.
Иккинчидан, электр энергияси ва табиий газ етказиб бериш сифатсиз бўлса ҳамда етказиб беришда йўл қўйиладиган танаффуснинг давомийлигига риоя қилинмаса истеъмолчилар билан қайта ҳисоб-китоб қилинишига оид қоидалар белгиланмоқда.
Илғор хорижий давлатларнинг тажрибаси ўрганилганда уларда энергия етказиб беришда йўл қўйиладиган танаффусларнинг аниқ давомийлик муддатлари кўрсатилган ҳамда агар зарур сифатга эга бўлмаган ва (ёки) белгиланган давомийликдан ортиқ бўлган танаффуслар билан етказиб берилганда тўлов миқдори қайта ҳисоб-китоб қилиниши белгиланган.
Худди шу каби қоидалар Кўп квартирали уйларда иссиқлик таъминоти хизматлари кўрсатиш қоидаларида ҳам назарда тутилган. Бироқ электр энергияси ва табиий газ етказиб беришда бундай қоидалар назарда тутилмаган эди.
Учинчидан, электр энергияси ва табиий газ бўйича нореал қарздорликлар суммаси ошишининг олдини олиш мақсадида истеъмолчиларга даврлар бўйича сарфлаган энергияси ва унга тўлаган тўловлар тўғрисидаги аниқ ахборотларни олиш ҳуқуқи берилмоқда. Ушбу амалиёт кўплаб хорижий давлатларда, хусусан, Европа Иттифоқига аъзо бўлган мамлакатларда кенг қўлланилиб келинмоқда.
Тўртинчидан, «Шахсга доир маълумотлар тўғрисида»ги қонун талабларидан келиб чиқиб, ҳудудий электр тармоқлари корхоналари ва газ таъминоти ташкилотларига истеъмолчиларнинг шахсига доир маълумотларини учинчи шахсларга ошкор этмаслик мажбурияти юкланмоқда. Амалдаги қоидаларда электр энергияси ва табиий газ етказиб беришда ва энергия таъминоти шартномасини расмийлаштиришда энергия таъминоти ташкилотлари истеъмолчилар ҳақида маълумотларга эга бўлади.
Бешинчидан, мурожаатларни қабул қилиш мақсадида 24 соат мобайнида туну кун ишлайдиган ягона Call-center марказлари фаолиятини ташкил этиш белгиланмоқда. Бунинг натижасида республиканинг турли ҳудудларида истеъмолчиларнинг электр энергияси ва табиий газ истеъмол қилишида юзага келган муаммолари тезкорлик билан бартараф этилади.
Олтинчидан, истеъмолчиларнинг ҳуқуқлари сифатида умумий фойдаланишдаги энергия тармоқларини ўз маблағлари ҳисобидан таъмирлаганда ёки тиклаганда, энергия таъминоти ташкилотидан ушбу ҳаражатларни қисқа муддатда қоплаб берилишини талаб қилиш ҳуқуқи киритилмоқда. Амалиётда энергия тармоқларидаги таъмирлаш ишлари етказиб берувчи ташкилот томонидан ўз вақтида амалга оширилмаётганлиги сабабли, маиший истеъмолчилар ушбу носозликларни ўз маблағлари ҳисобидан таъмирламоқда.
Еттинчидан, электр энергиясини ҳисобга олиш электр асбоблари ҳудудий электр тармоқлари корхонаси маблағлари ҳисобидан алмаштирилиши билан боғлиқ ўзгартиришлар киритилмоқда. Амалдаги қоидаларда янгидан фойдаланишга топширилаётган кўп квартирали уй-жойларни ўз балансига қабул қилиб олган ташкилотлар ёхуд қурувчилар электр энергияни ҳисобга олиш асбобларини ва уларни ўрнатиш бўйича кўрсатилган хизмат нархини ўз ҳисобидан тўлаши шартлиги белгилаб қўйилган.
Шу билан бирга, лойиҳада истеъмолчиларнинг ҳуқуқларини ҳимоя қилишга оид бошқа бир қатор қоидалар ҳам киритилмоқда.
Изоҳ (0)