БААда паспортлари йўқолгани сабаб қийин аҳволга туриб қолган икки нафар фуқарога ёрдам берилди. Бу ҳақда «Дунё» ахборот агентлиги хабар берди.
Маълум қилинишича, Ўзбекистоннинг Дубайдаги Бош консулхонаси ходимлари икки нафар кекса фуқаро Шаржа халқаро аэропортининг транзит ҳудудида бўлиб турган вақтида шахсни тасдиқловчи ҳужжатларини йўқотиб қўйгани сабаб ватанга қайтиш учун улар амалий ёрдамга муҳтож экани тўғрисида хабар топганидан сўнг масалага ойдинлик киритиш мақсадида атрофлича ўрганди.
Аниқланишича, улар Умра сафарини амалга ошириб бўлганидан сўнг Жидда—Шаржа—Тошкент йўналиши бўйича Ўзбекистонга учиш вақтида паспортларини йўқотиб қўйишгани сабаб аэропортда қолиб кетган, ёнларида маблағ ҳам қолмаган.
Қийин аҳволда қолган кекса фуқароларга консуллик-ҳуқуқий ёрдам бериш мақсадида Шаржа халқаро аэропорти ҳуқуқни муҳофаза қилувчи идораларининг масъул ходимлари билан ўтказилган музокаралар натижасида уларга бепул меҳмонхона, уч маҳал овқат ва Шаржа—Тошкент йўналиши бўйича бепул авиачипта билан таъминлаш бўйича келишувга эришилган.
Изоҳ (0)