«Дарё» кундалигида 7 октябрда содир бўлган энг муҳим воқеалар
«Дарё» нашри 7 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Таниқли хонанда Даврон Ғойипов ўз туғилган кунида, 61 ёшида вафот этди
Ўзбекистонлик таниқли роk-pop юлдузи Даврон Ғойипов вафот этди. Бу ҳақда сухандон ва хонанда Толибжон Исроилов Instagram’даги саҳифасида хабар қилди.
«Мамлакат яна бир афсонасидан айрилди. Бугун ўз туғилган кунида роk-pop юлдузи Даврон Ғойипов оламдан ўтди», деб ёзади Толибжон Исроилов.
Даврон Ғойипов 1961 йил 7 октябрда туғилган. Мактабни битирганидан кейин 1978 йилда у «Ялла» гуруҳига бас гитарачи сифатида таклиф қилинади. 1980 йилда Даврон Ғойипов бошчилигида Ўзбекистондаги илк рок гуруҳи — «Оригинал» тузилади. 1980 йиллар бошларида ижро этилган «Бу нима бу?» қўшиғи гуруҳга катта машҳурлик олиб келган.
Бундан ташқари, «Қайдасан», «Керак эмас шаҳло кўзларинг», «Откритое окно» каби қўшиқлар ҳам мухлислар кўнгилларидан жой олган.
Бразилия ва Мексика Россиянинг Украинадаги босқинини қораловчи резолюцияни қўллаб-қувватламади
Бразилия, Мексика ва Аргентина Америка давлатлари ташкилотининг (ОАС) йиллик йиғилишида Россиянинг Украинадаги ҳарбий амалиётини қораловчи резолюцияни қўллаб-қувватламади, деб хабар бермоқда Infobae.
Ҳужжатни Гватемала ташқи ишлар вазири Марио Букаро тақдим этган. «Россиянинг Украинадаги агрессиясини тўхтатиш бўйича изчил чақириқлар тўғрисида» деб номланган резолюцияда Россия ҳукуматини «ҳарбий ҳаракатларни тўхтатиш, Украинадан қўшин ва ҳарбий техникасини олиб чиқиш ҳамда диалог ва дипломатия йўлига қайтишга чақириш зарурати назарда тутилган».
Апрель ойида ОАС Кенгаши Украинадаги жанговар ҳаракатлар туфайли Россиянинг ташкилотдаги кузатувчи мақомини тўхтатиб қўйган эди.
Зеленскийнинг матбуот котиби Украина президенти НАТОни Россияга превентив зарба беришга чақирмаганини айтди — у 24 февралгача бўлган даврни назарда тутган
Украина президентининг матбуот котиби маълум қилишича, Владимир Зеленский НАТОни Россия томонидан ядро қуроли қўлланилишига йўл қўймаслик учун унга превентив зарба беришга чақирмаган.
6 октябрь куни кечқурун Украина президенти Австралиянинг сиёсий ва иқтисодий тадқиқотлар билан шуғулланувчи Лоуи институти тадбирида видеоалоқа орқали сўзлаган нутқи катта шов-шувга сабаб бўлди.
«НАТО нима қилиши керак? Россиянинг ядро қуролидан фойдаланиш эҳтимолини йўқ қилиш лозим. Лекин энг муҳими, худди 24 февралгача бўлгани каби мен яна бир бор халқаро ҳамжамиятга мурожаат қиламан: агар ядро қуролдан фойдаланилса, уларнинг тақдири нима бўлишини билишлари учун олдиндан зарба бериш керак. Россиянинг ядровий зарбаларини кутиб, улардан кейин зарба бергандан фойда йўқ», — деди Зеленский.
Зеленский превентив ядро зарбасини назарда тутаётгани ёки гап оддий қурол ҳақида кетаётганига аниқлик киритмади. Бироқ Россия ҳукумати вакиллари унинг баёнотини айнан ядро қуролини қўллашга даъват деб қабул қилди.
Айни вазиятда АҚШ НАТОга 1997 йилдан кейин қўшилган мамлакатларга, шу жумладан, Польшага ядро қуролини жойлаштиришни режалаштирмаяпти, дея маълум қилди Давлат департаменти матбуот хизмати раҳбари Ведант Пател. Польша Шимолий Атлантика альянсига 1999 йилда қўшилган.
Путин президентликдан кетса, унинг лавозимига ким даъвогарлик қилиши мумкинлиги маълум қилинди
Россия Хавфсизлик кенгаши котиби Николай Патрушевнинг ўғли, қишлоқ хўжалик вазири Дмитрий Патрушев Владимир Путин Россия президентлигидан кетган тақдирда, ушбу лавозимга даъвогарлик қилиши мумкин. Бу ҳақда The Washington Post сиёсий таҳлилчиларга ва Николай Патрушевга яқин манбага таяниб ёзмоқда.
Июль ойида The Washington Post Дмитрий Патрушевнинг отаси, Хавфсизлик кенгаши котиби Николай Патрушев Кремлда «ҳаракатлантирувчи куч»га айлангани, унинг омма олдидаги нутқлари эса келажакда Владимир Путиннинг лавозимини эгаллаш истагидан дарак бериши мумкинлиги ҳақида ёзганди.
Таъкидланишича, Путиннинг президент лавозимидан айрилиши эҳтимоли ҳақидаги муҳокамалар Россиянинг халқаро майдонда яккалаб қўйилиши, шунингдек, фронтдаги муваффақиятсизликлардан ички норозиликлар фонида кучайган.
